又唔入！雲拿俾隊友老婆串：「去到邊都有呢啲前鋒！」

又係佢啦，添姆雲拿（Timo Werner）！喺英超接二連三差失機會，去到歐聯依然係腳風咁差，喺昨晚歐聯4強首回台對皇家馬德里，大好機會面對龍門，竟然射到咁正被擋出！（另文：英超最差前鋒？添姆雲拿「超肉酸撻Q」成德國輸波罪人）

比賽嘅第10分鐘，曼治後場搶到波，隨後一路帶波突破到前場左側，之後傳中，禁區右側嘅普列錫接應一刻見到位置更好嘅添姆雲拿，於是頭鎚二傳俾佢，後者喺小禁區無人看守下竟然就咁送個波俾古爾圖斯，呢個皇馬門神一句唔該都無就撲出咗。
影片（8:53 開始）：
https://www.youtube.com/watch?v=EPa6y6JxTdU

呢球真係睇到好多球迷都爆粗，就連泰亞高施華（Thiago Silva）嘅太太 Isabelle 都忍不住喺電視機前大鬧雲拿：「老友！呢啲就係報應啦。我哋去親邊支球隊，都總會一個咁嘅前鋒！呢位姓雲叫阿拿嘅，他叫咩名話？」

呢段片被上載到社交網站後，有網民就勸 Isabelle 唔好再玩社交網站，因為咁樣會令到泰亞高施華好尷尬。而亦有網民好奇究竟 Isabelle 係另指邊個，因為佢話去親邊支球隊都有豬隊友，咁係唔係之前喺PSG時就有咁嘅豬隊友？又係指邊個呢？有人就估係依家效力緊曼聯嘅卡雲尼。

講返轉頭，雲拿今賽季喺聯賽同歐聯獲得過29次絕佳破門機會，不過只係入咗8球，21次錯失良機係英超球員中是最多的，咁又難怪俾人串嘅。