影帝級拖延時間！英冠門將扮睇唔到小禁區線？

足球比賽中，領先嘅一方往往會拖延時間，目的係減少對方進攻嘅機會，近日英冠諾定咸森林嘅門將拜斯森巴（Brice Samba）就用咗一招新嘅拖延時間招數，佢竟然係扮睇唔到小禁區線！

喺上週末進行嘅第31輪英冠聯賽中，比賽進入全場補時階段，一球領先嘅諾定咸森林開始拖延時間。當時森林獲得球門球，但門將拜斯森巴先係故意跑去禁區另一邊拾球，而事實上禁區已經有一個波喺度。經過邊線球證提醒後，拜斯森巴慢慢跑去另一邊拿返個波，但佢似是故意喺小禁區線外擺個波，於是邊線球證又再次提醒佢要注意小禁區線。
拜斯森巴轉頭望望條小禁區線，做出一副「條線竟然喺呢度？」個樣，最後佢拿個波，手指指小禁區線嘅位置，先最終擺啱個位，然後慢條斯理開出球門球，成個過程嘅演技絕對拍得住奧斯卡影帝！