又串邊個?摩連奴:有人靠12碼就入咗10球,我唔係話哈利簡尼

球場新聞 於 04/01/2021 發表 收藏文章
「串王」摩連奴呢排頻頻出來串人,最近喺賽後訪問,佢又串對手某球員靠12碼就入咗10球,究竟佢係串緊邊個呢?

喺熱刺3:0贏咗列斯聯嘅賽後訪問,摩連奴先大讚自己嘅得意弟子孫興慜:「我覺得我哋有需要講一講孫興慜究竟係一個點樣嘅球員。佢攞咗普斯卡斯獎,佢又幫熱刺射入100球,唔計12碼,佢應該係英超頭三名殺手之一。」

跟著佢就開始串人:「有啲人一個球季淨係靠12碼就可以入到10球,注意,我唔係話哈利簡尼。」最後摩佬補充一句:「我對孫興慜(嘅成就)感到非常高興。」

https://www.youtube.com/watch?v=bAzzjEYC7qA
雖然摩連奴無指名道姓,不過有留意英超嘅都估到,佢講嘅人就係曼聯嘅主將般奴費南迪斯。自後上年1月加盟曼聯以來,般奴費南迪斯各項賽事已經射入15個12碼,其中7個係今季嘅(聯賽5個,歐聯2個)。而根據統計,佢今季為曼聯踢咗24場,入咗15球,12碼就幾乎佔咗一半。

其實「串王」都唔係第一次串般奴,喺今季開季前,摩連奴就咁講:「般奴加盟曼聯後踢得非常好,提高咗曼聯嘅水平,佢亦證明咗自己係一個非常優秀嘅劊子手,因為佢獲得20個12碼嘅機會。」

筆者喺呢度代曼聯球迷向摩連奴講一句:「12碼唔係入波呀?12碼你估易射呀!
標籤: 摩連奴  

留言


請按此登錄後留言。未成為會員? 立即註冊
    快捷鍵:←
    快捷鍵:→