25人中武肺 + 零後備 + 35歲客串打龍 河床奇蹟贏波!

球場新聞 於 20/05/2021 發表 收藏文章
香港時間今日上午8點,南美自由盃小組賽開戰就迎來咗一場非常熱血嘅比賽!

阿根廷嘅河床主場對陣哥倫比亞嘅聖達菲獨立。話說河床上上下下共有25人中咗武漢肺炎,其中包括注冊咗打自由盃嘅全部4名守門員,搞到佢哋只有10名健康球員+一名中場傷兵可以出場,不過喺勉強湊夠11人嘅情況下,佢哋竟然以2-1贏咗!

喺上輪去哥倫比亞踢完作客之後,河床返到阿根廷後就立刻檢驗到球隊有15人感染武漢肺炎,呢個名單之後仲不斷擴大到最終25人感染,包括全部4名門將。河床之後立刻申請未注冊嘅B隊守門員參加自由盃,可惜被賽會拒絕,無計可施之下,河床派出僅剩嘅10名健康隊員,仲派埋本身右腿筋受傷嘅35歲前華倫西亞中場安素皮利斯(Enzo Pérez)出任跑動最少嘅守門員位置,把守最後一關。呢十一人,其中只有6人代表河床喺聯賽踢過正選。


不過河床並無因為咁泄氣,反而迎來一個好嘅開局,開場僅僅3分鐘就先開紀錄。

踢到第6分鐘時,河床更將比分優勢擴大到2球。

聖達菲獨立上半場有成10次射門機會,可惜都被統統化解,其中2次被安素皮利斯撲出,4次被隊友封堵,4次偏出。

河床入咗兩球後加強防守,聖達菲獨立要去到第73分鐘先扳回一球。呢球就睇到安素皮利斯無守門員嘅基本意識,因為佢面對對方個球射門時第一反應唔係倒地擴大封堵面積,不過以一個客串門將,佢已經打出超水準。

最後河床全隊將士用命,加上聖達菲獨立進攻效率低下,22次射門只有5次射正。喺球證吹響終場哨聲嘅一剎那,河床全隊瘋狂擁抱慶祝,而安素皮利斯係格外激動。

全場官方精華:

安素皮利斯的表演實錄

標籤: 河床  南美自由盃  聖菲獨立  

留言


請按此登錄後留言。未成為會員? 立即註冊
    快捷鍵:←
    快捷鍵:→