講畀尼馬聽?點名美斯射12碼,麥巴比:「呢啲叫尊重!」

球場新聞 於 20/10/2021 發表 收藏文章
麥巴比呢個小朋友真係好有趣,講嘢非常率直,唔識塗脂抹粉,因此亦好容易得罪人自己都唔知,不過總括嚟講,筆者覺得佢對有能力嘅人都係十分尊重嘅。雖然之前做訪問,佢直言「美斯可以散步,我可以做多啲防守」,聽落好似有骨,但其實應是出於真心,只係太直接咁講咗出嚟,令人誤會咁解。就好似噚晚場歐聯,麥巴比博到一球12碼,佢諗都唔諗,就指住美斯,叫佢嚟主射。

麥巴比點名美斯射12碼:https://www.youtube.com/watch?v=eVQctV803yo

而身為球王嘅美斯亦好有風度以及照顧後輩,喺補時階段,巴黎再獲得十二碼,今次美斯投桃報李,放棄戴帽嘅機會,留返俾麥巴比主射,可惜後者唔知係咪緊張得滯,一射就一飛沖天去。賽後,麥巴比都想搵返個波射咗去邊:
loading

賽後訪問,麥巴比被問到第一個12碼,佢話:「點解我要俾十二碼美斯射?咁唔係好正常咩,呢啲係出於尊重。佢係世界最佳球員,佢嚟到我哋隊,能夠同佢合作係我哋嘅榮幸。佢射入咗,但第二球(十二碼),佢俾返我踢,結果我射失咗。 」

麥巴比呢句說話令我諗起美斯初到貴境,第一定第二場比賽,尼馬美斯同場,當時美斯仍未喺PSG開齋,而尼馬博到十二碼,呢個係讓俾美斯開齋嘅好機會,結果尼馬自己主射返。所以,唔知麥巴比賽後嘅說話又係唔係口快快講出嚟,定有心要講俾某人聽呢?就留待大家判斷啦。
標籤: 麥巴比  

留言


請按此登錄後留言。未成為會員? 立即註冊
    快捷鍵:←
    快捷鍵:→