【考古】鐵血銅獅佩奧爾！一個敢用頭擋住卡路士重炮嘅男人

一講到巴塞嘅傳奇後衛，相信有唔少球迷都會諗起一個披住長長啡金捲髮，活像一頭獅子嘅男人，佢個名叫佩奧爾（Carles Puyol ）。

喺佩奧爾咁多年球會同國家隊嘅生涯中，佢攞過6次西甲冠軍、3次歐聯同1次世界盃冠軍。令呢個一眼就可以認出嘅西班牙球員成功嘅因素，乃其令人難以置信嘅心態，同不惜一切代價嘅求勝欲，呢種頑強嘅決心係佩奧爾同其他球員最大嘅區別所在。

有一個片段最能為以上描述作一個證據。當時係西甲打吡大戰，巴塞對皇馬，施丹同魯爾頭兩次射門都被擋出，於是佩奧爾有時間跑返白界前回防，呢個時候，個波落到左側小禁區附近嘅卡路士腳下，佢助跑後順勢左腳掃把腳勁射，佩奧爾毫不猶豫，跳起銅頭一擋，將個波擋出界外。雖然卡路士呢球，相比起佢真正嘅重炮仲有一段距離，但喺呢種情況、呢種距離，有幾多個球員夠膽用個頭去擋當時嘅第一重炮嘅射門？

佩奧爾不但係一名出色嘅中堅，佢仲係一位非常有同理心，深得隊友喜愛嘅領袖。2011年，巴塞奪得歐聯冠軍，當時佩奧爾將自己嘅隊長臂章戴咗係患有肝癌，手術後剛復出無耐嘅艾比度（Éric Abidal）手上，並叫佢以隊長身份舉起獎盃。
事實上，佩奧爾講過，佢15年職業生涯中最偉大嘅時刻就係2011年喺溫布萊對曼聯嘅嗰場勝利，唔係因為結果，而係佢嘅朋友喺與疾病長期搏鬥後能夠舉起獎盃嘅一刻。