神級教練都搞唔掂？有趣數據顯示熱刺真係無冠軍命

熱刺日前官方宣佈，主帥干地落台，熱刺又重頭嚟過。

有時啲嘢真係講命水，點解咁多教練都教唔掂熱刺，即使係干地同摩連奴呢啲級數幫唔到球隊拿冠軍？數據機構 Squawka 提供咗一組有趣嘅數據。

Squawka 嘅數據顯示，兩位前熱刺主帥，干地同摩連奴喺佢哋嘅執教生涯中，每一隊執教咗至少50場比賽嘅球隊，佢哋都能夠帶領球隊奪冠，除咗熱刺！

摩連奴執教超過五十場嘅有波圖、車路士、國際米蘭、皇家馬德里、曼聯、羅馬都攞過冠軍；而干地喺巴里、祖雲達斯、車路士、國際米蘭亦都攞過冠軍。
咁點解只有熱刺攞唔到冠軍呢？如果唔係命水，咁可能係管理層出咗問題，想當年決賽前炒教練嘅，筆者都諗唔到有邊間球會會咁做。