狂人也落淚!摩連奴有望成為史上第一個歐洲「3大滿貫」教頭

球場新聞 於 06/05/2022 發表 收藏文章
迄今為止,喺「狂人」摩連奴22年嘅執教生涯中,佢已經無咩獎盃未攞過,如果有嘅話,相信就係嚟緊佢有機會攞埋嘅歐洲協會聯賽(簡稱:歐協聯)。昨晚,佢就帶領羅馬,以1-0擊敗英超嘅李斯特城,兩回合2-1殺入決賽,將與飛燕諾爭冠。

歐協聯係歐洲今季新增嘅賽事,亦係繼歐聯、歐霸之後,歐洲嘅第三大盃賽。摩連奴已經羸過歐聯同歐霸,如果羸埋呢個歐協聯,呢位狂人將會成為史上第一個歐洲「3大滿貫」教頭。所以唔知係咩因為咁,一向目空一切嘅摩連奴都忍唔住留下「狂人淚」!

loading

摩連奴第一次贏得歐洲盃賽係2003帶領波圖贏得歐霸,次年更進一步贏埋歐聯成為歐洲皇者,摩連奴亦因此成為球壇炙手可熱嘅教練,當時各大豪門無一不爭相要佢嚟教,後來車路士得到呢位狂人嘅「青睞」。

當時英超係由曼聯同阿仙奴壟斷,但摩連奴一嚟到就打破咗呢個兩雄相爭嘅嘅局面,首季就帶領車路士聯賽登頂,第二年更成功衛冕。其後,佢轉戰國際米蘭,帶領球隊相繼贏得國內聯賽同盃賽,更成功助國米歐聯奪冠,成為歐洲冠軍聯賽及意大利有史以來嘅首支三冠王球隊,而摩連奴亦都登上人生嘅最高峰!

征服完英超以及意甲之後,摩連奴又再尋找新挑戰,前往西甲班拿貝擔任皇家馬德里嘅教練。離開皇馬後,呢位狂人嘅職業生涯開始走下坡,佢重返英超,先後擔任車路士、曼聯,以及熱刺嘅教練,可惜都係不歡而散。最後,摩連奴選擇離開鎂光燈,前往意甲去執教羅馬。

如果喜歡我們的文章,請即分享到︰

標籤: 摩連奴  歐協聯  狂人  

留言


請按此登錄後留言。未成為會員? 立即註冊
    快捷鍵:←
    快捷鍵:→