曼迷特別難服侍?蘇B同期勁過高普,卻依然被85%球迷要求落台

球場新聞 於 19/10/2021 發表 收藏文章
過去5場比賽只贏到一場,擁有C朗嘅曼聯竟然陷入如斯困境,不禁令曼聯球迷失望,而要求主帥蘇斯克查(Ole Solskjær)下台嘅呼聲亦因此越來越大。喺呢種氣氛底下,有唔少球迷一定覺得蘇斯克查一無是處,佢帶領下嘅曼聯一定係輸多過贏,然而,事實又唔係咁。蘇斯克查嘅勝率比高普(Jurgen Klopp)同期執教利物浦其實仲要高。


《太陽報》統計了英超三大主帥高普、蘇斯克查同哥迪奧拿(Pep Guardiola)喺英超執教嘅頭162場比賽,結果發現同期嘅哥迪奧拿的確超班,佢帶領曼城嘅前162場比賽勝率遠超另外兩人,有116場勝利,只輸了22場,和了24場,勝率高達71.6%。

而球迷心目中覺得佢「好差」嘅蘇B,勝率竟然高過高普。蘇B執教曼聯162場比賽,贏咗89場,有36場和波同37場輸波,勝率達到54.9%。而高普喺利物浦嘅前162場比賽,贏到88場,和咗44場,輸咗30場,勝率比蘇B少0.5%,只有54.5%。

雖然蘇B嘅勝率優於高普,但《太陽報》同期做嘅統計顯示,仍有85%嘅讀者認為佢應該要落台,只有10%嘅球迷表示應該俾佢多少少時間,而餘下嘅5%就無意見。

其實唔難理解呢個結果,執教曼聯嘅壓力從來都唔係一般嘅細,因為佢哋曾經嘅輝煌戰績以及費格遜嘅傳奇,都係兩座難以逾越嘅大山,任何教練喺呢兩樣嘢面前都係唔達標。除非搵到個可以幫助曼聯連續奪冠嘅教練,否則只有等時間去遺忘以前嘅美好時光,重新出發,大家先會客觀去看待教練嘅能力。

如果喜歡我們的文章,請即分享到︰

標籤: 蘇B  高普  蘇斯克查  

留言


請按此登錄後留言。未成為會員? 立即註冊
    快捷鍵:←
    快捷鍵:→