暴殄天物!雲迪碧克淪為陪練喂波?

球場新聞 於 02/11/2021 發表 收藏文章
24歲嘅荷蘭球星雲迪碧克(Donny van de Beek),以近4000萬歐元加盟曼聯之後一直得不到蘇斯克查(Ole Solskjær)嘅青睞,最近喺對熱刺嘅比賽,大家終於見到佢,不過唔係出場比賽,而係喺賽前熱身時幫隊友陪練:



一位當打嘅球員竟然淪落到好似一般助教咁做陪練,真係令人心傷。有球迷見到呢個畫面,紛紛覺得曼聯太羞辱人,更將佢同費特比較:「我明白一位球員可能會被淘汰,但係相比起費特(Frederico Rodrigues),後者竟然可以獲得咁多機會,但係每次見到佢出場我都崩潰!」

其實今季雲迪碧克只代表過曼聯出戰咗三場,佢最後一次出場係喺9月嘅聯賽盃輸俾韋斯咸。坐咗冷板凳咁耐,雲迪碧克自己終於頂唔順,啱啱嘅消息係,佢已經向球會申請離開,據聞祖記同巴塞都有意借入呢位荷蘭球星。

筆者希望雲迪碧克可以去一間可以俾到正常上場時間佢嘅球會,重新證明自己嘅能力,無謂喺曼聯浪費青春,畢竟球員嘅黃金期係好有限架。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→