散步都費時！隊友進攻美斯企定定20秒幾乎唔郁

美斯近來耐唔耐都被球迷批評喺球場散步，態度懶散。亦有球迷指佢球會hea踢，而國家隊就出盡奶力。不過最近有條片睇到美斯竟然連散步都費時，引起球迷熱議。

呢場波係巴黎對里爾嘅比賽其中一幕，當時尼馬喺左邊進攻，禁區內嘅隊友都紛紛走位，準備可能嘅攻勢，但美斯就猶如局外人，自己一個喺禁區外，企定定，企咗足足20秒，真係幾乎無郁過：




有球迷就批評美斯平時散步防守都算，依家連進攻都咁懶散。但亦有球迷為美斯辯護，指出美斯其實係有留意住己方嘅發展，隨時準備加入進攻。
有球迷亦指出美斯可能係有傷在身，因為有鏡頭影到佢摸住自己大腿後則位置，似乎仲有啲痛苦：

而最新消息係，美斯喺世盃外對委內瑞拉嘅比賽中被對方球員踢傷左膝，2個月後嘅今日，佢嘅傷病仍然未痊癒，依家更加要到馬德里接受治療，唔知係唔係咁而影響佢嘅活動能力。

美斯已經年屆34歲，體力確實難以應付連續高強度嘅比賽，不過筆者始於希望片中嘅美斯只係一時未集中精神，畢竟見到一個生猛嘅美斯，絕對係球迷之福，因為睇一場賺一場，亦睇一場少一場。