尼馬無讓12碼 + 罰球中框 + 提早被換出!美斯嬲爆直接無視普捷天奴?

球場新聞 於 20/09/2021 發表 收藏文章
一個美斯,一個C朗,兩人主導了今個夏天嘅球壇熱點,不過暫時兩人喺新球隊嘅際遇似乎南轅北轍:C朗回歸曼聯,場場有波入,被球迷當正係救世主;相反,美斯喺PSG就仲未入到波,啱啱嗰場仲喺無受傷嘅情況下被提早換出,實屬罕見。

除咗提早被換出,今場波美斯好有機會可以收到佢加盟新球會嘅第一個入波,可惜偏偏天意弄人,第37分鐘,美斯主射一個美妙嘅罰球竟然同上一場一樣又係中框彈出。

另外第66分鐘,尼馬博到12碼,雖然說佢當然可以自己主射,但呢種情況唔讓俾美斯主射,似乎有失領袖風度,當然我哋唔知尼馬有無問過美斯,而對方係咪拒絕啦。不過講返轉頭,當年尼馬都係因為唔想活在美斯陰影下先選擇離隊開創自己嘅天地,依家美斯兜兜轉轉又同自己一隊,仲好大機會搶走球隊頭號球星之位,所以尼馬點諗真係佢自己先知。

官方全場精華:https://www.youtube.com/watch?v=hO5r6m2iMS8

不過筆者覺得最令美斯不滿嘅,係主帥普捷天奴(Mauricio Pochettino)竟然喺第77分鐘提早換走無病無痛嘅美斯,後來普帥嘅解釋係想保護美斯,以免佢受傷。

美斯離場時,好明顯對普捷天奴呢個決定非常不滿,後者本想向美斯握手示意,可惜竟然直接被美斯忽略,睇嚟普帥都要諗下點樣可以安撫呢位球王同埋球迷,仲有當正美斯識生金蛋嘅管理層啦。


影片:https://www.youtube.com/watch?v=7zi1wGiUux4
標籤: 尼馬  美斯  普捷天奴  

留言


請按此登錄後留言。未成為會員? 立即註冊
    快捷鍵:←
    快捷鍵:→