好彩無斷腳!黃潛悍將「收山腳」直剷美斯腳踝

球場新聞 於 26/04/2021 發表 收藏文章
香港時間4月25日晚,巴塞隆拿作客以2-1逆轉「黃色潛水艇」維拉利爾,距離領頭羊馬體會只係差2分。不過呢場波,巴塞贏得一啲都唔輕鬆,皇牌美斯仲差啲俾人「收山」。

美斯場場都會被重點照顧,不過今場維拉利爾似乎好有決心要限制美斯嘅發揮,於是對佢嘅防守非常深嚴。美斯雖然對呢啲「巨星待遇」見慣不怪,但今場的確受到一定限制,某程度上維拉利爾的戰術可算是成功。


去到比賽第65分鐘,美斯遭遇到佢今場最凶狠嘅攔截,文奴捷古路斯(Manu Trigueros)一腳凶狠嘅飛鏟,直接鏟喺了美斯小腿腳踝,美斯當場倒地表情痛苦,而文奴捷古路斯亦被直接紅牌趕離場。若果唔係有護脛保護,美斯可能會直接骨折:
https://www.youtube.com/watch?v=MSI5NUJ9m78

除此之外,美斯今場全場一共遭遇對手四次凶狠犯規,而美斯每一次都被踢倒喺地上。有網民直呼:「踢完呢場比賽,美斯仲未死真係好彩!」

雖然外界普遍認為呢張紅牌無死錯人,不過維拉利爾方面似乎唔係咁睇,佢哋嘅教練艾馬利(Unai Emery)表示:「捷古路斯掂到個波,慣性滑行,所以先令佢掂到美斯。不過我想問一個問題:如果兩個人角色互換,還會唔會有紅牌呢?」
標籤: 美斯  收山腳  

留言


請按此登錄後留言。未成為會員? 立即註冊
    快捷鍵:←
    快捷鍵:→