天意弄人?為了彌補遺憾,卻造成了更大的遺憾 — 艾朗藍斯

球場新聞 於 20/05/2022 發表 收藏文章
德甲嘅法蘭克福與蘇超嘅格拉斯哥流浪於歐霸盃決賽大戰,雙方踢咗120分鐘都分唔到勝負,最後要由12碼定生死。

Joe Aribo 喺第57分鐘為流浪取得領先,呢球要歸功於對手杜達(Tuta)喺入波前嘅一次失誤,呢名法蘭克福後衛更不得不因傷被直接換出場。

不過流浪嘅優勢只係領先咗12分鐘,69分鐘,拉菲爾波利(Rafael Santos Borre)撞射得手,為法蘭克福追平。

結果,雙方喺法定時間內打成平手,要打到去加時階段。加時下半場尾段,法蘭克福嘅守門員奇雲查普(Kevin Trapp)有兩次關鍵撲救,為球隊力保不失,最後比賽要戰至互射十二碼分勝負。

法蘭克福5射皆中,而格拉斯哥流浪唯一宴客嘅係後備出場嘅阿仙奴舊將艾朗藍斯(Aaron Ramsey)。

loading


三年前,艾朗藍斯曾隨著阿仙奴殺入歐霸盃決賽,可惜當時佢有傷在身,只能坐後備席睇波,結果阿仙奴以1-4輸咗俾同係英超嘅車路士。

三年後,艾朗藍斯雖然換咗球隊,但終於可以踢到歐霸盃決賽,賽前佢曾經表示要彌補三年前嘅遺憾,可惜結果造物弄人:117分鐘先被換上場嘅藍斯,卻係唯一12碼宴客嘅球員。


不過話時話,大家有無發覺,專門換出嚟射十二碼嘅,通常都無乜好結果?

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→