地獄黑仔王!卡路爾2分鐘內連入2球生涯最佳入球,可惜都係炸糊!

球場新聞 於 12/01/2022 發表 收藏文章
大家仲記唔記得卡路爾?呢位前物物浦射手上年11月以短約加盟英冠嘅雷丁,昨日一場富咸對戰雷丁嘅英冠賽事,卡路爾都有出場,仲2分鐘內射入2球世界波,甚至乎係佢生涯嘅最佳入波,可惜都被吹咗越位,慘食兩次炸糊,認真黑仔!

今次賽事,富咸早早就領先,不過好快雷丁進攻,卡路爾接應隊友傳波,背住龍門,球不著地就施展一記倒掛,球彈地後越過守門員隻手認聲入網。可惜卡路爾早早已經處於越位位置,與對手相差幾個身位,球證無可能走漏眼。

僅僅一分鐘之後,卡路爾又喺禁區附近接應隊友左路傳送,今次佢就心口控定,然後一個半轉身,又係球不著地起腳,結果左腳轟出一記世界波,對方龍門都無晒反應,可惜哨子聲又響起,今次係佢喺越位位置走返出嚟,又食炸糊!


兩球炸糊之後,雷丁後勁不繼,完半場前被富咸射入2—0。下半場,雷丁更加係徹底崩潰,富咸5個不同球員連入5球,結果雷丁以0-7大敗於富咸腳下。

自從11月以短期交易加入雷丁以來,卡路爾喺7次出場中只入咗一球,佢喺雷丁嘅合約將於1月15日到期,不過雷丁希望延長佢嘅逗留時間。雷丁經理 Veljko Paunovi c已經確認球會已經向卡路爾提出咗報價,現在正在等待答復。佢話:「可以肯定嘅係,我哋喺截止日期前準時提出了報價,我們期待著可能嘅最佳結果。」

官方 Youtube 精華:
https://www.youtube.com/watch?v=oeN3m05sp-A

如果喜歡我們的文章,請即分享到︰

標籤: 卡路爾  富咸  雷丁  

留言


請按此登錄後留言。未成為會員? 立即註冊
    快捷鍵:←
    快捷鍵:→