加盟3日處子戰即出事!蘇甲門將大腳長傳,結果傳返入自己龍?

球場新聞 於 22/03/2021 發表 收藏文章
昨晚嘅蘇格蘭甲組聯賽第12輪,鄧巴頓主場0-1不敵福弗爾,而全場唯一嘅入球,竟然係一個十分離奇嘅烏龍波,主角仲要係啱啱加盟鄧巴頓第三日嘅英格蘭門將 Sam Ramsbottom。

由於正選門將受傷,鄧巴頓喺本月18日簽咗呢名24歲嘅門將,喺加盟時,鄧巴頓主帥仲稱讚呢位英格蘭門將:「他真係好唔錯架,佢會係今季剩餘比賽中我哋嘅重要人物。」

今場處子戰中,Ramsbottom 的確真係重要人物!喺比賽嘅第56分鐘,佢放低個波準備大腳長傳,但個波就省中自己嘅後衛 Ryan McGeever,然後竟然彈向自己個龍,雖然 Ramsbottom 立即撲向個龍試圖挽救錯誤,但可惜已經嚟唔切......就咁樣,鄧巴頓主場三分全失,而 Ramsbottom 就留低咗一個「難忘」嘅處子戰。

不過亦有人批評後衛 Ryan McGeever,佢哋嘅論點係當時 Ramsbottom 有啲緊張,而對手已經逼到埋身,但 Ryan McGeever 就竟然完全無去留意自己同 Ramsbottom 嘅距離,仲企正喺長傳路線,所以某程度上,Ryan McGeever 都要負啲責任,唔知大家又同唔同意呢?
loading

loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→