利記名宿：隊中只有兩人夠資格踢曼聯！

又一場難睇肉酸嘅慘敗！

時代輪流轉，昔日嘅英超班霸曼聯，依加幾乎任何一支英超球隊都可以欺負佢哋，昨日佢哋就恥辱地以0-4輸喺白禮頓腳下，呢個賽果真係令到唔少曼聯球迷死心！

成場波，曼聯一籌莫展，就連一向信心滿滿嘅C.朗拿度都一度露出苦笑，睇嚟今季之後，曼聯重建（其實一直在重建）在所難免，而且有好多球員肯定會離隊。

曼聯嘅垃圾表現亦引嚟利物浦名宿桑拿士（Graeme Souness）嘅批評，佢更加直言，現時呢隊曼聯陣中，只有兩個人夠資格踢曼聯：「你希望球員對球隊忠誠，你希望球員為球隊嘅未來而戰，但我對佢哋好多人（喺呢兩方面）有疑問。好多個都表現好差，但你知道佢哋都係好出色嘅球員，可是你必須表現出嚟先得。對我嚟講，只有C.朗拿度同迪基亞，之後你好難搵到其他球員夠資格踢曼聯。」

輪俾白禮頓之後，莫講話第四，曼聯有可能跌到落第七。無論如何，曼聯將以1993年以來最差嘅積分結束今季，並且係自從1979年以來失球數最多嘅一季，不過當時曼聯至少仲入到足總盃決賽。

究竟奧脫福仲要沉多幾多季呢？我諗真正嘅曼聯球迷應該要俾啲耐性，至少唔係下個賽季就可以解決到的事。