其實唔易？基沙文單刀半空龍竟然射到離晒譜！

同樣係歐國聯賽事，法國以1:1同克羅地亞打成平手，而呢場波嘅焦點係法國嘅前鋒基沙文。

已經陷入5個月入球荒嘅基沙文今場波有唔少機會破局，可惜都係同入波擦身而過，其中有一球係對方回傳失誤，克羅地亞門將 Dominik Livaković 解圍時省中勤力嘅基沙文，後者越過守門員，並追到個波。此時，對方兩名後衛亦趕到，基沙文面對住半空門。

可惜，對住呢個黃金機會，基沙文求其一腳，將個波射咗出界。



有球迷替呢位馬體會前鋒講好說話，認為呢球唔易處理，不過亦有球迷話如果基沙文射中龍，就算俾後衛清咗出界，係可以接受，但相反，佢處理得一塌糊塗，甚至都射唔中目標。

同2016年歐洲盃嘅最佳射手相比，依家嘅基沙文的確退步咗好多。
當年如日中天嘅基沙文以1.2億歐元從馬德里體育會轉會去巴塞隆拿，可惜佢喺巴塞度過咗一段艱難嘅日子，之後佢又返到馬體會，希望呢個佢成名嘅地方可以再次令佢嘅職業生涯回到正軌。

但係呢位法國前鋒係西甲聯賽出場26次，只射入咗可憐嘅3球，佢有時甚至會俾自己嘅球迷噓。

雖然基沙文自己都承認佢對自己今季嘅表現感到沮喪，但馬體會主席似乎未放棄佢。據《馬卡報》報道，馬體會主席 Enrique Cerezo 話：「對我嚟講，基沙文係歐洲最好嘅三到四個球員之一。（嘩，呢句說話雖然筆者聽完都覺得尷尬，不過亦表示球會對基沙文嘅支持。）佢係馬體會嘅球員，同馬體會有合約，佢將會繼續效力馬體會。」

基沙文現時係以租借方式簽約一個賽季，不過可以選擇再延長一年。此外，合約仲有一個強制性嘅4000萬歐元永久購買條款，將喺2023年激活。