【伊巴 vs 盧卡古】伊巴涉歧視?盧卡古:X你老婆同老母!

球場新聞 於 27/01/2021 發表 收藏文章
意大利盃迎來米蘭打吡,最終國米2比1擊敗AC米蘭,但呢場嘅焦點唔係誰勝勝負,而是兩大球星「火星撞地球」嘅衝突,以及佢哋嘅對話,呢兩大球星就係國米嘅盧卡古(Romelu Lukaku)同AC米蘭嘅伊巴謙莫域(Zlatan Ibrahimovic)。

事件發生喺上半場,當時盧卡古喺右路突破,但遭到羅馬洛尼粗野攔阻跌低,盧卡古即刻起身想搵佢算帳,於是雙方球員就擁埋一齊。後來火爆嘅伊巴謙莫域加戰團,仲口嗡嗡,好似向盧卡古講咗啲嘢。盧卡古聽到後立即衝向伊巴,後者有備而來用頭頂向盧卡古下巴。最後,兩人各食一張黃牌,打和,SUPER!

https://www.youtube.com/watch?v=vXKefoa02a4https://www.youtube.com/watch?v=VQ3-0zSPzwU
咁究竟伊巴向盧卡古講咗嘅咩,令到對方咁嬲呢?意大利媒體就曝出咗真相,完整對話如下:
  
  伊巴:你個蠢驢!

  盧卡古:你個臭雞(bitch),睇住嚟!

  伊巴:打俾你老母啦,搞返你哋嗰啲「巫毒教」嘅白痴嘢啦!

  盧卡古:X你老母,X你老婆,你呢個臭雞。

  盧卡古:你真係傾我媽媽?你呢個狗娘養嘅仆街!等我向你後腦開一槍!

媒過話盧卡古一聽到「巫毒教」就著咗火。咁「巫毒教」同盧卡古有咩關係呢?有人話伊巴咁講係種族歧視,其實唔係。

巫毒教又譯為伏都教,源於非洲西部。話說當年愛華頓想同盧卡古續約,但後者想去車路士,其後愛華頓老闆莫斯里喺一個訪問中咁講:「盧卡古打咗個電話俾佢媽媽,然後佢話佢做咗個巫毒教儀式,而儀式傳達咗一個訊息俾佢,就係要佢去車路士。」

其後盧卡古同佢經理人都否認「巫毒教」嘅事,盧卡古仲威脅要起訴莫斯里,其後「巫毒教」成為盧卡古嘅禁忌。
呢個就係點解盧卡古聽咗呢三個字會著火嘅原因。

順便一提,大家仲記唔記得盧卡古同伊巴謙係當年效力曼聯嘅隊友嚟。

如果喜歡我們的文章,請即分享到︰

標籤: 伊巴謙莫域  盧卡古  

留言


請按此登錄後留言。未成為會員? 立即註冊
    快捷鍵:←
    快捷鍵:→