你有你攻，我有我守----摩佬完勝比爾沙 熱刺對列斯聯賽後評 精選

今場贏波真係天時地利人和兼備，成功造就咗摩連奴完勝比爾沙。小弟認為，贏波嘅關鍵係體力與士氣。同列斯聯相比，真係高下立見。我成日強調體力同士氣嘅關係，其實兩者真係有好密切嘅連繫。


熱刺對富咸嘅賽事因為富咸陣中多名職球員確診而延期，熱刺因而獲得一個禮拜嘅休息時間，唔需要一週雙賽，自然喺體能上有優勢，有相對更多休息同訓練嘅時間。相反列斯聯已經連續兩週排出相同嘅正選陣容，同時喺週中曾經有比賽，球員嘅體力相對不及對手，踢起上嚟都冇咁得心應手。因此，體力上嘅優勢令熱刺能夠喺呢場比賽佔優，成功擊敗對手。

成日都講體力同士氣嘅關係，既然熱刺體力上佔優，士氣上都相對會較佳。體力佔優，無論進攻、防守都有優勢，特別係去到比賽嘅尾段，呢樣會特別明顯，自然係士氣上面都會有優勢。同樣，如果體力不足，對士氣亦有影響，相對上都會比較差。

講完贏波嘅關鍵之後，等小弟簡單評論吓呢場比賽。

整體上，上半場比較平淡，但熱刺仍然能夠領先完半場。頭10分鐘雙方踢法比較進取，列斯聯維持一貫踢法，帶嚟唔少威脅，而熱刺嘅球員都好肯逼搶，兩隊踢得比較有活力。但上半場其餘時間節奏相對較慢，列斯聯嘅進攻次數唔多，雖然有兩次入肉嘅黃金機會，但悉數未能把握。熱刺亦都冇乜快速反擊嘅機會，比賽嘅戰況膠著，同時雙方逼搶嘅意欲同強度亦唔大，但係上半場熱刺仍然能夠憑較好嘅把握力同及時轉換陣式，領先2-0完半場，透過兩次攻勢分別搏到12碼同製造入球。
下半場節奏明顯加快，但熱刺仍然靠死球拉開比數，列斯聯就算換入年輕球員錫高頓同普維達，完全控制形勢，不斷搶攻，就算喺各項數據佔盡優勢，包括控球率等等，都唔能夠攻破熱刺嘅大門，摩連奴繼續一貫嘅做法，喺領先之後退守，就算比爾沙堅持無時無刻都全力進攻，死都想入返粒，但係受制於摩連奴擅長嘅死守戰術，熱刺成功零封對手，呢樣都係取勝關鍵之一。


無可否認嘅係，一向攻強守弱、頭重腳輕嘅列斯聯防守方面的確麻麻，佢哋今場嘅發揮亦都係喺水準之下，進攻唔夠銳利，防守唔夠穩陣，一向具威脅嘅快速進攻都唔太奏效，先造就到呢場勝利。小弟喺賽前似乎高估咗呢個情況下嘅列斯聯。