【英超大結局】「Big6」最後一輪全數贏波、阿仙奴失前四、哈利簡尼奪金靴!

有趣足球事件簿 於 22/05/2017 發表 收藏文章
16-17年既英超聯賽,日前終告落幕,除咗歐戰資格同埋降班名額得到落實之外,多個個人獎項既得主亦都塵埃落定,而以下就係今季英超既完季小總結。

歐聯資格:車路士、熱刺、曼城、利物浦(需踢歐聯附加賽)
歐霸資格:阿仙奴、曼聯(若於歐霸決賽中勝出,將直接出戰歐聯)、愛華頓
降班球隊:侯城、米杜士堡、新特蘭
升班球隊:紐卡素、白禮頓、哈德斯菲爾德 / 雷丁(升班附加賽決賽將於5月29日舉行)


喺最後一輪既英超賽事入面,「Big6」全數贏波,提前奪冠既車路士以5:1擊敗新特蘭、專心備戰歐霸盃決賽既曼聯,就以2:0輕取水晶宮,而2隊喺賽後既排名都冇變過,分別係排第1位同第6位。

至於第2位既熱刺,繼上場作客6:1大勝李斯特城之後,今場再接再厲,大炒已經降班既侯城「七個一皮」,而英格蘭國腳哈利簡尼更加係大演帽子戲法,狀態相當出色。最終,哈利簡尼更加係壓過愛華頓既盧卡古,同埋阿仙奴既山齊士,以29個入波成功衛冕英超神射手!



然後就要講下賽前分別排緊英超第3、4、5位既曼城、利物浦同阿仙奴啦。呢3隊喺今輪既聯賽入面,都係贏波而回,曼城就客勝屈福特5:0,至於主場出擊既利物浦同阿仙奴,就各自以3:0同埋3:1既比數,贏咗米杜士堡同埋愛華頓。




贏波之後,曼城所得既分數係78分,至於利物浦就有76分,而阿仙奴就得75分,所以賽前排名第5既槍手,今季既最終排名都係第5,最終拎唔到歐聯資格,來季需要喺歐霸角逐。

再講返個人獎項先!哈利簡尼就拎咗今屆既英超神射手,咁助攻王又係邊個呢?16-17年球季英超助攻王既得主就係曼城中場奇雲迪布尼,喺36場既英超上陣入面,佢一共貢獻咗18次既助攻,最終力壓熱刺中場艾歷臣,同埋史雲斯核心施格臣拎獎!

除咗神射手同埋助攻王之外,仲有「金手套」!今屆既得主就係車路士門將古圖爾斯啦!呢位比利時國腳今季總共交出16次既零封,成為今季英超裡面,零封次數最多既門將,最終令佢成功壓過迪基亞(曼聯)同埋羅利斯(熱刺)拎獎。


講完球員啦,再講返球會先。16-17年球季既英超入面,共攻入86球既熱刺係火力最強既一隊,至於冠軍得主車路士既入球數字,就有85個,排喺第2位,而曼城(80球)同埋利物浦(78球),亦都緊隨其後。

至於失波最多既一隊,居然唔係早早確認降班既新特蘭,而係喺今輪聯賽入面,輸1:7既侯城!「老虎」今季既聯賽失球數字,高達80個,成為咗降班既關鍵。咁失波數字第二多個隊呢?就係史雲斯啦,佢地今季錄得70個失波,睇黎教練基文迪都要諗諗計點拆啦。

喺「Clean Sheets」既保持方面,今季零封次數最多既英超球隊有兩隊,分別係成日喺主場打和既曼聯,同埋發展潛力好大既熱刺,就各有17場。

至於上屆既英超冠軍李斯特城,又踢成點呢?最終,狐狸軍團係以第12名衝線,成為英超史上成績最差既衛冕冠軍,而佢地喺今輪聯賽入面,就以1:1打和般尼茅夫。


16-17年球季,英超各數據一覽:

神射手:哈利簡尼(熱刺、29球)
助攻王:奇雲迪布尼(曼城、18次)
金手套:古圖爾斯(車路士)


英超官方最佳球員:簡迪(車路士)
PFA年度最佳球員:簡迪(車路士)
FWA年度最佳球員:簡迪(車路士)
PFA年度最佳新秀:阿里(熱刺)


傳球次數最多:艾斯派古達(車路士、2455次)
射門次數最多:阿古路(曼城、139次)
頭鎚入球最多:洛蘭迪(史雲斯、9次)
十二碼入球最多:占士米拿(利物浦、7次)
中柱次數最多:奇雲迪布尼(曼城、9次)
失機次數最多:伊巴謙莫域(曼聯、18次)
傳中次數最多:施格臣(史雲斯、305次)
成功爭頂最多:賓迪基(水晶宮、325次)
越位次數最多:伊巴謙莫域(曼聯、37次)
攔截次數最多:古爾(愛華頓、135次)
犯規次數最多:賓迪基(水晶宮、81次)
黃牌最多(球員):賀利巴斯(屈福特、14張)
黃牌最多(球隊):屈福特(84張)
紅牌最多(球員):米基比圖斯(屈福特)、費蘭甸奴(曼城)、薩卡(阿仙奴) - 各2張
紅牌最多(球隊):侯城、屈福特、韋斯咸 - 各5張
解圍次數最多:曲克(般尼茅夫、349次)
攔截射門最多:美爾(般尼、46次)
護空門最多:美爾(般尼、3次)
撲救次數最多:希頓(般尼、141次)
後備上陣最多:笠臣簡奴(西布朗、24次)
被換出次數最多:夏薩特(車路士、25次)
踢滿38場的球員:艾斯派古達(車路士)、曲克(般尼茅夫)、費沙科士打(修咸頓)、賓科士打(西布朗)、吉遜(米杜士堡)


英超官網
https://www.premierleague.com/stats

如果喜歡我們的文章,請即分享到︰

留言


請按此登錄後留言。未成為會員? 立即註冊
快捷鍵:←
快捷鍵:→