【法甲年度頒獎禮】摩納哥成為大贏家、前曼聯人亦有獎拎!

有趣足球事件簿 於 16/05/2017 發表 收藏文章
較早前,法國球員工會(UNFP)年度頒獎典禮順利舉行,而喺今次既頒獎典禮上,就有5個相當重要既獎盃頒發,分別係年度最佳球員、最佳門將、最佳新秀、最佳海外球員(法國)同埋最佳教練,已各個獎項既得主亦已經出爐啦!先講最佳球員。

16-17年既法甲年度最佳球員獎得主,就係巴黎聖日耳門前鋒卡雲尼。喺伊巴謙莫域轉投曼聯之後,卡雲尼就成為PSG鋒線既第一球星,今季已幫聖日耳門入咗35個聯賽入球,效率相當出眾!


然後,就係最佳門將啦。今屆既年度最佳門將得主,就係來自克羅地亞、效力緊摩納哥既蘇巴錫,至於佢既隊友麥巴比,就成功擊敗利馬、拉比奧特同埋施普利安,拎到年度最佳新秀,相信都冇乜爭議性架啦。



年度最佳海外球員(法國)方面,得獎者就係車路士中場簡迪。上季,簡迪協助李斯特城奇蹟咁拎到英超冠軍,今季再喺轉投車路士之後,為藍軍帶來英超冠軍既寶座,拎獎絕對係實至名歸啦!


講完一班球員之後,終於到教練啦。16-17年球季既法甲最佳教練得主,就係摩納哥主帥渣甸。今季,渣甸帶領摩納哥踢出相當悅目既進攻足球,唔只止成功殺入歐聯4強,依家仲向勇奪法甲冠軍進發,渣帥既領軍實力可見一斑。


除咗以上5個大獎之外,唔好唔記得仲有年度最佳入球,同埋年度最佳11人未揭曉呀。年度最佳入球獎既得主,就係投身法甲僅僅半季既里昂翼鋒迪比,佢喺里昂4:0大勝圖盧茲既比賽入面,交出一球半場笠射,技驚四座!至於年度最佳11人名單,就喺下面:

門將:蘇巴錫(摩納哥)
後衛:施迪比(摩納哥)、基利克(摩納哥)、堤亞高施華(PSG)、文迪(摩納哥)
中場:貝拿度施華(摩納哥)、華拉堤(PSG)、施利(尼斯)
前鋒:麥巴比(摩納哥)、卡雲尼(PSG)、拿卡錫迪(里昂)



【詳細得獎名單如下】

最佳球員:卡雲尼(PSG)
最佳門將:蘇巴錫(摩納哥)
最佳新秀:麥巴比(摩納哥)
最佳海外球員(法國):簡迪(車路士)
最佳教練:渣甸(摩納哥)
最佳入球:迪比(里昂)

如果喜歡我們的文章,請即分享到︰

標籤: 卡雲尼  蘇巴錫  麥巴比  簡迪  渣甸  迪比  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→