2018世界杯前瞻(二)

不知道⚽😂 於 02/05/2018 發表 收藏文章
好,上一次世界盃前瞻講完A,B組,今次到C,D組喇。

C組: 法國,澳洲,秘魯,丹麥
呢一組相信都好大機會(80%)係法國首名出綫架喇。法國座擁基沙文,銀河唯一等世界級前鋒,配上新星林馬,馬迪爾,麥巴比。中場亦有普巴助攻,拉比奧特,馬度迪同簡迪負責防守,中前場可謂粒粒皆星。惟後防可能穿窿,比較可靠的後衛只有華拉尼同烏姆迪迪(高B連尼...別説了)。左右閘位亦分別只有古沙華同Jallet較可靠,睇黎都係要望龍門兼隊長洛利斯化險為夷。澳洲方面...大家大概只係識Tim Cahill,隊長Jedinak,中場阿倫穆爾等人,英超兵還有效力白禮頓嘅門將賴恩,實力雖然唔差,但係同組有法國同丹麥真係有D難度,能突圍分組賽已經係創舉。呢組大家較不熟悉嘅應該係秘魯。秘魯國家隊只由效力莫斯科火車頭嘅法芬,效力法林明哥嘅前鋒古里路同寥寥可數嘅外流兵,如屈福特嘅安達卡里路支撐,唔想墊底還看呢幾個重心球員表現如何。丹麥人脚較好,相對澳洲及秘魯有先天性優勢。前中後龍都有唔錯既人選,前鋒有上季荷甲神射手佐根遜,中場有大家最熟悉的艾力臣,後防亦有西維爾守將卡積亞,貝迪斯左閘杜米斯,仲有車路士既基斯坦臣同李斯特城門將舒米高。

預計出綫隊伍:法國首名,丹麥次名

D組: 阿根廷,克羅地亞,冰島,尼日利亞
呢一組應該係最難估計,四隊打起上黎都差唔多。先講阿根廷,美斯又黎...一個救全家。但次次都揾球王出黎救駕都唔係辦法。森帕奧利揀人真係有D問題,西瓜恩唔多講,阿古路又易傷,反而甘大個戴巴拿唔用...後防又唔知點解要叫富尼斯莫利(今季係愛華頓出得一次...)。中場同翼位方面反而係最多人,好似迪馬利亞,羅馬的Perotti,班尼加,蘭仙尼,碧利亞同馬斯真蘭奴等。Anyway,阿根廷都係等美斯救駕架喇,各位阿根廷fans要祈求美斯再次做神喇。克羅地亞雖然唔係一個大國,但係都出產少好球員,例如摩迪,拉傑迪,比列錫,文素基治等。後防就...有個炸彈雲。當然都有正常人,如效力比錫達斯既維達。而門將則是效力摩納哥的舒巴錫。雖然後防不穩,但靠中場既摩迪同拉傑迪做下遮綫工作應該都頂到D攻勢。冰島係其中一支近年彈起既球隊,代表作相信係2016歐洲國家杯2比1踢英格蘭出局。呢隊波既重心球員有施古臣(愛華),古蒙臣(般尼)等。而冰島國脚足跡都遍佈意甲,法甲同荷甲等聯賽,令呢隊黎至人口不足35萬既小國既球隊收到世界性既認可。最後一隊係超霸鷹尼日利亞。尼日利亞實力都好强,擁有一大咋外流兵,最為人熟悉嘅莫過於域陀摩西斯,伊恩拿祖,尼迪迪,燒鵝脾等人。雖然尼日利亞無咩星級守將,但靠整支球隊嘅紀律同體力加上英超攔截王尼迪迪坐鎮,防守應無甚問題,而戰術方面預計會用防反。
預計出線隊伍: 阿根廷首名,丹麥次名

P.S.今集講到呢度,敬請期待下一集。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→