謝四:皇馬入決賽對我地更有利! #歐聯決賽前瞻 Ft. 3 battles to watch

不知道⚽😂 於 08/05/2018 發表 收藏文章
等左10年喇...小編我等左10年,終於係歐聯決賽見返利記喇。感動唔多講,但做人最緊要識向前望。早前神奇隊長謝四就話:「皇馬入決賽對我地更有利。」,相信好多球迷都唔明白。計牌面皇馬一定好過利物浦,計大賽經驗都一定係皇馬贏(真心依家呢隊利物浦有邊個以前踢過歐聯)。究竟神奇隊長點解會話皇馬入決賽對利物浦有利?
原因一: 戰術因素
皇馬戰術其實同利物浦差唔多,都係高壓逼搶反擊,不過皇馬多左easy goal同艾辛斯奧呢類創造型球員,或會拖慢進攻節奏,就好似有古仔果隊利物浦甘。所以當呢兩個球員持球果陣就係利物浦搶波既最好時機,另外卻奧斯都係可以逼既位置。呢個就係戰術因素,係源於皇馬未能徹底進行逼搶反擊戰術,中間又持球嘗試創造攻勢。另外就係皇馬一定會同利物浦對攻,導致後方出現空位,令沙拿/文尼有機會打快速反擊,加上皇馬兩閘多數會壓得比較前,面對利物浦既快速側擊未必追得切。
原因二: 心理因素
皇馬力求三連霸,求勝心切,無論係球迷定係領隊施丹同管理層都會比到好大壓力球員(可能連球員本身都會比好大壓力自己)。呢種心情會令到成隊波打法變得急進,希望儘快爭取入球。但正正就係呢種思想會令皇馬有機會失波先,就好似利物浦贏曼城4比3果次甘。相反,利物浦初次晉身歐聯決賽(係高普時代),心理包袱比較少,而且無D咩可以輸。作爲不被看好既一方,就已經無野好驚(因爲比較少人有期望)。正如美國作家James Baldwin講過:每一個社會中最危險既係無野可以輸既人。憑著呢個心態,利物浦今季歐聯遇神殺神,有力挑戰大耳杯。

好喇,黎到3 battles to watch既部分喇。
1st Battle Cristiano Ronaldo vs Virgil van Dijk
由於施丹今季係BBC三個輪住傷既情形下,施丹開始將CR7越搬越入,CR7漸漸成為右前鋒,就算BBC出齊,巴爾都係打邊中場,因此CR7將會對上全球最貴後衛VVD。而睇過早前荷蘭對葡萄牙嘅友誼賽就會見到兩位國家隊隊長嘅對決。VVD能守住CR7,亦無懼係CR7嘅壓逼下用波。但係CR7係歐聯有狀態加成,所以呢兩位球員嘅交鋒應該會好好睇。
2nd Battle Mo Salah vs Marcelo Vierra+Sergio Ramos
大紅人沙拿今季狀態火熱,為一眾後衛帶來惡夢,以高速同超人一般嘅技術成爲各球隊既心腹大患。呢位人稱“埃及美斯”既翼鋒至今已經係歐聯同英超爲利物浦射入41個入球,有能力為皇馬防綫帶來衝擊。因此小編預計沙拿將會由左閘馬些路同右中堅拉莫斯共同負責。兩位防守球員均屬頂級人馬,甚至有能力成為該位置的世界最佳球員。但所謂初生之犢不怕虎,相信沙拿即使歐戰經驗略少也必出盡殺手鐧嘗試戲弄呢兩個世界級後衛。
3rd Battle James Milner vs Luka Modric
悶蛋先生米拿今季成爲歐聯史上最多助攻球員(1季内),能以32嵗之齡及有限的上陣時間(792分鐘)創出記錄。盡顯悶蛋先生既功架。米拿作為利物浦中場中最可靠的一位,相信必定招來皇馬嚴密既防守。米拿既能攻亦能守,而係高普帶領下亦都不惜氣力逼搶。對返位占士米拿既對手就係盧卡摩迪。鬥快兩個應該差唔多,但係講身體對抗性就係米拿好D。以下係2人係歐聯既數據比較。
因此,呢兩個中場之間既較量應該係占士米拿稍有優勢,不過摩迪仍然有能力與他一決雌雄,所以仍然係一場含金量高既對決。

好喇由依家開始等決賽喇,期待一場熱血(不過唔好見紅)既比賽!

如果喜歡我們的文章,請即分享到︰

留言


請按此登錄後留言。未成為會員? 立即註冊
  • wombat 於 08/05/2018 評論 NO. 1

    無論結果點都好,入到決賽已經係超額完成。 享受場比賽就得

  • Liew Wen Feiy 於 08/05/2018 評論 NO. 2

    请问casemiro有禁赛吗?

  • Karl Li 於 08/05/2018 評論 NO. 3

    差點中左你既幻術,你講到利記係上風咁既款

  • 專業球迷咩都寫 於 08/05/2018 評論 NO. 4

    @Liew Wen Feiy
    不會的。黃牌會隨著進入決賽而消失。如球員於四强比賽中吃紅牌,那就會禁賽

  • 專業球迷咩都寫 於 08/05/2018 評論 NO. 5

    @Karl Li
    點會呢... 只要凍結沙拿利物浦就什麽都不是(係皇馬面前)

快捷鍵:←
快捷鍵:→