紅軍拔“刺”定熱刺獲“利”?

不知道⚽😂 於 04/02/2018 發表 收藏文章
今晚深夜12點上演紅軍主場惡鬥熱刺嘅重頭戲,相信唔少球迷都好關注,依家就等小編解釋一下局勢啦!(純粹個人意見,有其他意見歡迎comment)
主場嘅利物浦今年只輸過一場主場(足總杯對西布朗),而聯賽就不敗,連盟主曼城黎到都一分不保,可見晏非路嘅氣勢真係有返咁上下,依然係紅軍堅實嘅堡壘。紅軍聯賽係主場只係失過7球,仲要有3球係對曼城失,呢場對熱刺黎講一定係硬仗。進攻方面問題應該不大,雖然文尼狀態稍差,但陣中還有沙拿,以及狀態火熱嘅費明奴,而中場安利璨恩同張伯倫亦有一定嘅入球能力,進攻板斧係古仔離開後亦得以維持。
防守不穩一向係紅軍致命傷,預料雲迪克今日會重返正選,與馬迪普合組中堅,而羅拔臣同祖高美斯應該擔正。中場方面選擇較多,但面對艾力臣同阿里,高普應該會派出較為防守性同剷截力強嘅中場,例如璨恩同米拿。雖然有一定數量嘅球迷要求高普派出艾格斯打正前,但相信前線3子變動嘅機會應該不大。
熱刺方面,作客錄得6勝2和4負,成績唔差(當然不算最好)。核心艾力臣回歸絕對係一大喜訊,上場就係佢11秒入波打亂曼聯陣腳,令熱刺以2:0取勝,加上王牌哈利簡尼持續大勇,有力衝擊利物浦不穩嘅防線。熱刺前線4子哈利簡尼,孫興民,艾禮臣同阿里合共攻入41球,與利物浦Fab 4嘅43球不相伯仲,加上古天奴已走,熱刺攻擊點似乎較多,而後衛賓戴維斯亦有兩球在手,係死球攻勢有一定威脅(仲有高大中鋒洛蘭迪)。所以鬥攻熱刺絕對有本錢。
熱刺防守絕對比利物浦出色,睇龍都知... 而艾達維列特回歸亦係好事。上場熱刺只用戴雲遜山齊士同維頓漢亦足以零封坐擁山神,連格,盧卡古同馬迪爾等進攻好手嘅曼聯,今場預計熱刺將派出雲耶馬同戴亞打防中加強逼搶能力以應付紅軍強大嘅進攻。
總括黎講呢場激戰勝負難料,但計近況熱刺就略勝一籌。不過考慮到熱刺作客Big 6成績一向慘不忍睹,加上晏飛路強勁嘅氣勢,紅軍即使防守稍差亦有能力與熱刺一戰。

留言


請按此登錄後留言。未成為會員? 立即註冊
  • wombat 於 04/02/2018 評論 NO. 1

    打和留番畀下場對阿奴先。 救心就準備好㗎喇, 點都撐利記打爆熱刺,salah hat trick

  • Patrickewell 於 04/02/2018 評論 NO. 2

    無得打,熱刺作客屎到痺,和到波都當贏

快捷鍵:←
快捷鍵:→