“水貨”傳奇,淘寶正貨——荷西保連奴

不知道⚽😂 於 20/01/2018 發表 收藏文章

保連奴呢個名大家應該都係呢排先聽返,以前我都無咩聽過,無咩留意。因為佢係熱刺唔係主角,睇巴西就淨係諗卡卡(2010),尼馬(2014)。我淨係知道一樣野-----巴塞今年係淘寶買到一樣少有嘅正貨。

今季巴塞以至西甲最強收購固然係保叔保連奴啦!保叔今季上陣18場入8球,不但擺脫水貨污名,更成為球隊後上攻門嘅一大殺著。保叔經常靠著靈活嘅走位深入對方腹地,雖然多數都係靠掃把腳或者頭槌攻門並不華麗,但係非常有效,尤其係當陣中有美斯,恩尼斯達等傳球大師,保連奴嘅後插攻門更顯重要。最近對皇家蘇斯達巴塞落後2比0果陣就係保連奴嘅掃把腳為巴塞追番一球。保連奴亦保足左巴塞進攻時缺少嘅幾分硬淨。巴塞中前場多數係技術型球員,體力對抗能力欠奉,如美斯,恩尼斯達,拉傑迪,全部都唔夠撞(玻璃丹比利即刻收聲)。保連奴嘅加入為巴塞進攻提供左一啲硬淨嘅元素,增加巴塞進攻板斧爭勝。

除左入波之外,保連奴亦有防守能力。現時巴塞中場缺乏對防線嘅保護,能夠集速度,體力,身材於一身嘅應該只有保連奴。布斯基斯欠速度,拉傑迪欠身材,而恩尼斯達就較少回防。因此,防守責任常落係布斯基斯身上,但布斯基斯雖然29歲但速度已經等於慢梅(阿仙奴梅迪剎卡)。因此,保連奴亦肩負保護防線嘅責任,而作為地上最強嘅第一道防線,保連奴表現亦不俗:場均1.1剷球,0.5攔截,0.3解圍。保連奴場期處於中場最前端,咁嘅數字真係咁上下。

當然,攻中嘅最大任務係組織攻勢。巴塞有美斯坐鎮,當然唔愁呢樣。不過超人都有攰嘅時候,保連奴就有用武之地喇。保連奴目前累積2個助攻,傳球成功率係87.7%,有0.4個關鍵傳送,以一個力量型嘅攻中黎講係真係唔錯。

總括黎講,保連奴真係淘寶千年難得一見嘅對版貨,應該係超值就真...真係別人笑我太瘋癲,我笑他人看不穿。華維迪真係好嘢,期待下1年嘅收購!!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • superpyc
    superpyc 於 21/01/2018 評論 NO. 1

    以前冇聽過又知佢水貨?講真佢成名咁耐,有睇開波都會聽過

  • Akakak
    Akakak 於 21/01/2018 評論 NO. 2

    呢排先聽過保連奴就咪學人寫文啦廢柴!佢世界杯成名再踢熱刺,一早出哂名啦

  • Paul Tsang23
    Paul Tsang23 於 21/01/2018 評論 NO. 3

    我睇完個句 :[以前我都無聽過]. 即刻諗 筆者既波 齡

  • OhMyGirl_Arin
    OhMyGirl_Arin 於 21/01/2018 評論 NO. 4

    保連奴都無聽過 筆者應該係小學生 保連奴都算成名左好耐啦wor 係踢熱刺之前都已經幾有名下

  • Paul Sun
    Paul Sun 於 21/01/2018 評論 NO. 5

    大家又唔好咁插佢 筆者波齡起碼有半年 因為佢知道保連奴踢緊巴塞 我撐你👍 #曲線要講明

快捷鍵:←
快捷鍵:→