【球迷嘅浪漫】有人為份工失去人生,有小保加球迷為愛隊付出事業愛情

場邊筆記簿 於 10/12/2018 發表 收藏文章
香港人大部分時間都為生活勞碌,「要返工,不了。」或許係最多香港人拒絕約會的理由,生活逼人令到唔少香港人都唔敢做自己想做嘅嘢。不過有啲阿根廷球迷就為咗見證大戰,所有嘢都唔要。香港時間今日(12月10號)凌晨一場一拖再拖嘅阿根廷死戰終於喺西班牙馬德里上演,有一位受訪嘅阿根廷球迷就話唔少球迷都放棄咗事業、愛情等嘅嘢先嚟到西班牙。
兩隊有唔少球迷遠洋由阿根廷去到西班牙支持愛隊

河床同小保加兩隊傳統死敵喺洲際賽決賽碰頭,可以話「引爆」兩隊球迷情緒,佢哋喺次回合比賽之前發生一次嚴重襲擊事件,仲令到小保加嘅柏保路佩雷斯Pablo Pérez受傷。次回合經歷連番阻撓,由上月24號拖到今時今日,最後南美洲足協以安全為由將次回合移師西班牙馬德里舉行,次回合河床喺加時階段連入兩球反勝,兩回合比數河床5-3擊敗小保加,捧起南美自由盃。
河床最後成功捧起南美自由盃

兩隊都分別拎到25,000張班拿貝球場嘅入場票,仲吸引到美斯Lionel Messi入場睇依場大戰,有一個小保加球迷會嘅成員Nicolas Mattera接受訪問就話以佢所知有好多球迷都有自己嘅故事,都犧牲咗好多嘢先嚟到。

Nicolas Mattera話:「以我所知好多球迷都有佢哋嘅故事,有啲人賣車嚟換旅費,有啲人因為咁樣離婚,佢哋會畀人問到『要小保加定係我?』,有好多人都放棄工作甚至畀人炒都要跟隨小保加,佢哋都犧牲自己嘅人生嚟撐愛隊。」

大家又有冇試過面對一樣一生人點都想做一次嘅嘢?到時你又會點揀?


Source:
Sportbible
Marca

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→