[球筆著地] 我係斑馬迷，但老實講熱刺係輸得唔抵。 精選

作為斑馬迷，睇直播睇到好亢奮，同時又一額汗。 今日睇得最多嘅三個字，「輸經驗」，經驗某程度上可以當係一種實力，但唔可以當飯食...(祖記近三年兩入歐聯決賽...都算多經驗...咪又係GG><)

講返今場波，熱刺呢隊歐聯新丁，唔單止拎住兩個作客入球同埋主場氣勢，最大優勢係 「活力」! 面對住平均年齡過30，真係老嘅老婦人，點解唔同你鬥快鬥搶鬥迫？ 就算巴沙利死守右閘位唔出擊，含住條高麗蔘踢波嘅孫興慜話爆就爆你，而且搶攻戰術亦相當奏效，整個上半場差唔多零封祖記。祖記半場只輸一球，除咗要讚將士用命，其實都可以話係大命...作為斑馬迷，上半場真係睇到差啲喊出嚟...
下半場，雙方原班人馬上陣，對於活力充沛嘅熱刺，搶攻就係最佳嘅防守，上半場贏得壓倒性優勢，沿用同一個戰術套路，相當合情合理。如果有睇直播，唔難發現祖記下半場出嚟，防守明顯係硬淨同凶狠咗，10分鐘內兩位中堅都拎咗黃牌，睇得出球員喺落後情況係有啲心浮氣燥。55分鐘，面對咁樣嘅祖記，熱刺冇理由咁早打守勢波，更加要入多球拎個燕梳，要盡快推祖記落絕望深淵。 所以我好同意普帥嘅部署。

奇就奇在囧帥喺60分鐘出奇招踢出奇蹟。(奇在望住呢個冇攻擊球員嘅後備名單，半場已經好擔心，要撳制都唔知換個...) 焗住放手一搏，都唯有放兩邊閘位出嚟打翼衛，打一個近乎係2-5-3 嘅陣式，估佢唔到地即刻有成效，竟然係7分鐘內追平再反cup，普帥都未出招去守就已經被囧帥兩劍封喉，我相信雙方球員球迷甚至係囧帥自己都冇諗過咁快見效!
之後就係你急我唔急時間，轉返祖記最看家嘅防守踢法，變返4-4-1-1咁打防反，熱刺都唯有放晒飛機大炮出嚟衝，雖然領先，其實保方面前都風聲鶴唳，靠血肉城牆再加些少運氣先可以保持勝局完場晉級，你話如果熱刺入多球迫到加時，我都想像唔到班老人家點樣頂到120分鐘...


講到尾，我認為今晚波嘅關鍵係把握力多過所謂經驗，祖記兩個前鋒冇乜起腳，只係把握到兩次機會就足夠。加上後上反撲嘅氣勢，一班老將嘅熱血同鬥志都谷晒出嚟，可以同熱刺班後生仔搏鎚，見到基亞連尼幾次瞓身解圍真係好high!!

晉級當然開心，但都多謝熱刺呢兩回合幫祖記上咗好好嘅一課，最後，
當然要多謝埋條門柱啦!
再利申，我真係斑馬迷。