[球筆著地] 柴台之前可唔可以畀少少掌聲?

球筆著地 於 15/03/2018 發表 收藏文章
相信因為科蘭效應,唔少都好似我咁有留意傑志呢4場亞冠波。 琴晚鄭展龍左腳遠柱補時絕殺,可以話全場瘋狂,興奮莫名,鬼煞咁嘈,嗌咗出嚟。


不過一如既往,好多網民都出嚟大潑冷水,「咁早打多個唔係贏唔到吓嘛」「贏咗咪又係出局」...

係係係,大家嘅眼光都好宏觀好獨到好有遠見,而我只係想借呢篇文去鼓勵一眾本土香港仔,

因為喺香港地踢一場好波,其實好難。

需知道傑志喺港超超班,但面對一眾亞冠球隊只係BB班,係魚腩中嘅魚腩,頭3場加埋,輸足10比0。 大膽講句,對傑志拎唔到3分真係要喊出嚟。

今次第四場出擊亞冠爆冷贏波,呢3分係靠成隊傑志拼返嚟! 主場出擊加上早段打多一人嘅優勢,先勉強可以同柏雷素爾打成均勢(其實都唔算均勢,全場計埋控球比率都係四六比)。但成隊波唔騰雞唔淆底,肯搶肯攻唔龜縮,當然打多一個踢得冇咁辛苦,同埋大家都知,再冇分落袋就真係唔駛踢。

然後再望望個出場陣容,唔計入藉兵,正選只有盧均宜,唐建文,李毅凱三個本土球員,計埋後備上陣嘅鄭展龍,都係四個咁大把。要喺爭取上陣已經唔易,再要爭取到表現更加困難。

隊長盧均宜,成條右路走上走落,助攻助守,有一腳長傳斬入禁區畀科蘭,微毫不差,只係科蘭被力迫之下起唔到腳。
(source:體路)

唐建文,見到唔少人留言話係無名英雄,真係好安慰,大家都睇到佢真係殺咗好多波,對住班又快又扭得日本兵真係好難守。
(source:HKFA)

李毅凱,同樣喺中路守咗好多波,頂住步大力雄嘅盧比斯爆頭顏射個腳半空門尤其關鍵重要!
(source:HKFA)

鄭展龍,20歲仔,最後10分鐘上陣搏殺, 右路禁區邊被力迫,再自己搶返個波殺入禁區左腳射個世界波,幫傑志全取3分兼攞埋MOM!
(source:體路)


雖然今仗贏波,但傑志出局嘅呼聲冇低過。


贏波功勞,當然係全隊上上下下,上下一心咁拼返嚟。 數字上出線仲有希望,但你知我知全隊傑志都知,好難。就算最後真係出局,但千祈唔好抹殺每位球員嘅拼勁同付出。

仲有,好希望大家記得呢班球員嘅名,畀多少少鼓勵,畀多少少獎聲,因為喺香港做全職足球員真係要好大勇氣。

如果喜歡我們的文章,請即分享到︰

標籤: 傑志  鄭展龍  盧均宜  唐建文  李毅凱  亞冠  補時  絕殺  

留言

會員
我要評論
請按此登錄後留言。未成為會員? 立即註冊
  • Ksl
    Ksl 於 15/03/2018 評論 NO. 1

    加油!

  • makfish
    makfish 於 16/03/2018 評論 NO. 2

    努力!

  • 球筆著地
    球筆著地 於 17/03/2018 評論 NO. 3

    大家咁話

快捷鍵:←
快捷鍵:→