[球筆著地] 有啲傳統勁旅,係因為傳統先成為勁旅。

球筆著地 於 21/06/2018 發表 收藏文章
筆者講緊嘅係上屆亞軍阿根廷。
阿根廷的確係傳統勁旅,因為歷史上贏得2次世界盃冠軍,3次亞軍,以及14次美州金盃。
盛產攻擊好手之餘兼且坐擁馬勒當拿同美斯兩代球皇級球員。

由2014拎世盃亞軍,15 16分別兩屆美洲盃亞軍,看似國際賽成績唔差,
但其實今屆絕對可以用四個字形容:名大於實!

對比起4年前當打嘅陣容,今屆核心成員依舊,
美斯、馬斯查蘭奴、迪馬利亞、碧基亞、希古恩、亞古路。
雖然夾慣夾熟但眾人都年過三十,
上場對冰島睇到迪馬利亞同遠赴中超嘅馬斯查蘭奴,落腳、爆破已經冇咗當年個種sharp 。

世盃外圍賽,阿根廷要打到最後一輪兼趁對手失分先可以驚險晉身世界盃,
最後一場靠美斯帽子戲法,一個救全家。

但正正突顯一個近年阿根廷為人詬病嘅問題:由有多個球星好手嘅球隊變成美斯&friends 嘅一人球隊。

只要美斯Fit 就贏,唔fit 就輸, 所以琴日提到只要凍結美斯已經贏一半。
戰術圍住美斯而轉,畀極大自由度美斯去發揮去策動,得就得,唔得就忽得。
相反,對手要防阿根廷亦變得相當輕易。

再者美斯踢逆境波嘅EQ唔高,唔止上場對冰島,好多時球隊落後,美斯選擇唔信隊友或者太相信自己, 選擇獨闖龍潭,一個扭幾個然後禁區邊左腳射遠柱,呢啲波,入咗你係英雄,唔入你就係獨食,但美斯就係呢種一人之力扭轉局勢嘅人,佢入唔入,隊友都只可以選擇相信佢呢個隊長。
(網上圖片)
而今屆最大嘅問題係條相當一般嘅後防線。 門將冇咗羅美路,換上36歲卡巴尼路大打折扣, 中堅係洛荷拍奧達文迪,兩閘位沙維奧、達利亞費高,4人防線都令人冇乜信心。(網上圖片)

上場對住冰島單調進攻模式都顯得吃力,失個球正正係禁區混戰畀芬保加臣射入。 再望望後備名單,高佬法斯奧、右閘美卡度、左閘安沙迪, 三將都係31歲,要變要換都係揀唔落手。(網上圖片)

筆者世盃前已預計阿根廷無法出線,講到尾,因為今屆真係稱唔上係勁旅。
雖然喺小組看似睇高一線,但其實都係個名,今屆攻不銳守不穩的確令人擔心。
唯一變數可能係迪巴拿,雖然同美斯疊位,但如果敢同時出兩人,雙核自由派波,或者可以分擔嚴防同解放美斯。
(網上圖片)

但我唔相信阿根廷森柏奧利會將迪巴拿放正選,而今輪對住東歐最強中場線嘅克羅地亞,預計阿根廷踢得相當吃力,搶到一分可能都要劏雞還神。
(網上圖片)

如果喜歡我們的文章,請即分享到︰

標籤: 阿根廷  Argentina  亞軍廷  worldcup  Russia2018  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→