[球筆著地] 拼了90分鐘鬥志,還是最後一秒鬆懈了...

球筆著地 於 12/04/2018 發表 收藏文章
(網上圖片)

集中集中集中!
每入一球,領隊艾歷尼都喺場邊提醒一次,偏偏臨完場出現大戰必備嘅紅牌加12碼。


歐聯8強次回合,祖記輸住3個作客入球作客班拿貝,大家都知係九死一生,但適逢前一晚羅馬驚天逆轉巴塞,同樣係意甲對西甲,全隊上下多咗一份希望同決心。

仇恨,永遠係最大嘅動力。

由上年決賽到上回合,加埋輸7:1嘅祖記賽前表明,就算無法晉級,都要有說服力咁贏返皇馬。 新仇加舊恨,雖然缺少迪巴拿,祖記換上Plan B 文蘇迪傑擺明高空轟炸,再擺出一個接近4-3-3嘅4-5-1嘅逼搶陣式,5人中場連埋箭頭西瓜前場壓迫,然後兩閘插上助攻。

(網上圖片)

開賽75秒,即時收到效用!!!基迪拉右路傳中文蘇飛頂入網。 追返一球,祖記多次照新辦煮碗。
決心就係唔容許有任何差錯。
頭10分鐘,右路不斷傳中畀左路嘅文蘇,可惜迪斯基尼奧幾次嘅出波都欠缺準繩,囧帥見到有缺口就更加要弱點進攻,大膽咁喺16分鐘作出第一個換人調動,34歲嘅列治斯坦拿入替25歲嘅迪斯基尼奧。

羅馬示範咗誓不放棄嘅拼勁,然而,巴塞亦示範咗咩叫老貓燒鬚。

閃電失球嘅皇馬冇好似巴塞咁越踢越慌,始終主場出擊,加上擅打反擊,皇馬加快進攻節奏,壓返上前搶返唔少攻勢,伊斯高仲食咗個詐糊。

幸好今仗祖記防守嚴密,頂得住皇馬呢一浪攻勢,兼可以反守為攻,用同一招,同一套路,38分鐘列治斯坦拿右路疊瓦助攻,文蘇左路力壓卡華查頂入,再追一球,2:0返入更衣室。

施丹半場換入華斯基斯同阿辛斯奧兩個後生仔,壓制祖記兩閘,尤其右閘位上前助攻。戰況有點膠著,去到60分鐘,哥斯達右路扯個波入去禁區,馬度迪禁區外10幾碼加速殺入去,首回合極好表現嘅拿華斯竟然甩手,送咗隻死雞畀馬度迪執! 3:0 !祖記首回合嘅劣勢完全挽回!及後希古恩仲有一球快腳,爭啲搶到第4球!

75分鐘,祖記班老人家開始現疲態,逼搶、反擊冇咁銳利,開始屯兵於後場,雙方踢得有啲保守,始終呢個時候失波真係冇仇報。直至85分鐘,祖記傳波多次斷纜,被皇馬圍攻,一眾後防人肉長城,保方左飛右撲,用鬥志頂埋佢完場打加時。雖然加時冇必勝嘅把握,但仍有兩個換人名額係祖記最大嘅籌碼!

當越接近終點,鬥志就越薄弱...
就係等加時...變成響喪鐘...


補時最後一分鐘,卻奧斯禁區頂斬去右路,辛度相當唔積極唔集中嘅防守,令C朗輕易二傳至小禁區...
集中集中集中! 偏偏喺呢個時候鬆懈了...

往後嘅,大家都好清楚,
各人對呢個12碼有唔睇法,
對我嚟講係一個唔算好清脆嘅攔截,但判唔判罰全係球證觀點與角度。

(網上圖片)
出局已成定局,亦係首回合之後,大家預計嘅結果。作為斑馬迷,一直冇奢求過奇蹟反勝晉級,只求踢一場好波。 老實講就算冇嗰球12碼,都仲要打多30分鐘,要反勝真係唔易。
而呢場應該係保方最後一場歐戰,睇返全場,好應該畀掌聲呢個表現唔似40歲嘅隊長,以及全隊上下賣力嘅表現,踢咗一場好有說服力嘅好波。

接住保方退下來嘅事實,來季係祖記改朝換代換血嘅開始,重新計劃下一個新斑馬王朝。
#FORZAJUVE

如果喜歡我們的文章,請即分享到︰

標籤: 祖雲達斯  皇馬  保方  歐聯  12碼  紅牌  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→