【防守技術分析】曼聯輸自己　防守失誤致敗局 精選 推薦

琴晚曼聯作客屈福特嘅比賽以三比一落敗，連同上週對曼城及週中對飛燕諾嘅比賽，曼聯已經錄得三連敗。呢個情況，甚少發生係摩連奴第一年帶領嘅隊伍身上。咁究竟曼聯輸啲咩？其實只係輸比自己啲防守。

上場聯賽對曼城犯錯連連嘅白蘭特退居後備，由史摩寧拍住拜利，本身以為今場曼聯防守會略有改善。點知有睇呢場波嘅你，就知道個問題根本唔單止講緊中堅不穩，而係成個防守企位出咗問題。睇下失嘅第一球波先：

https://media.giphy.com/media/l3vR21rYs6FkfOqek/giphy.gif
由攻轉守漏洞多：
姑勿論第一個失波，屈福特球員偷走馬斯亞嘅腳下球有否構成犯規，我地都可以睇到，曼聯球員轉攻為守依然好弱。雲高爾時代曼聯失去控球權後防守漏洞極多，呢點係前一篇文章有提及，呢度唔多作解釋，但係最想唔到摩佬手下嘅曼聯依然未能改善呢個問題。係失去控球權之後，史摩寧補左閘位，正路。拜利守近柱，正常。費蘭尼補中堅位，合理。但後上嘅卡保奧空哂，係娥眉月衝入黎，冇任何防守球員，呢個時候就會問，防中係邊度？

中場中路組合嘅人選相信摩佬要再三思量一下。普巴繼效力祖記時，已證明自己攻優於守。佢有良好發揮，都係多得後方仲有馬治斯奧，派路等等嘅頂級防中，佢先可以完美演譯Box to Box呢個角色。依家得有勇無謀嘅費蘭尼拍住佢，明顯中場防守力十分不足，單睇呢個失波已經可以完全解釋到。再睇番球波，當時中場中路只得費蘭尼一個回防，朗尼企位太前（當然普巴仲前...），想回防都為時已晚。所以，解決方法只得一個，就係將局限朗尼或者普巴嘅位置，等球隊失波時唔會出現兩個「攻中」。
而第二個問題就係防守球員位置感問題......

https://media.giphy.com/media/3oz8xCAMjvWyZpIAqk/giphy.gif

防守企位差：

上一段都有提及到少少關於曼聯球員嘅防守企位問題，呢球失波就能夠完全反映。最大問題，在於中堅同防中位置隔得太過開。普巴同史摩寧隔到成條河咁闊，中間比人一「湯」就穿。然後，費蘭尼再次因為補位，回防嘅馬達又來遲一步，普巴又冇補番費蘭尼個位，導致禁區出少少嘅位置空哂，蘇寧加一射就入網。更離譜嘅係，曼聯禁區足足有七個人咁多，而屈福特能夠只用四個球員就瓦解到呢個防守陣式，原因很簡單，就係球員防守時企位出錯與及意識不足。
要明白到，足球防守最緊要中路守得穩。當中場同中堅位置唔緊密，中路比人「湯」穿哂，迪基亞真係幾撲得都冇用。或者摩佬都要諗一諗，防中需要再另覓人選，定係索性棄用朗尼，以普巴為進攻重心。