「靜靜起革命，誓要複製李城傳奇」—— 般尼茅夫 精選 推薦

上季英超有李斯特城傳奇之後，好多人都話，英超冠軍呢啲機會就好似中六合彩咁，係有人中，但未必輪到你咁解姐。我諗，上年開季嘅時候，連李斯特城領隊雲尼亞里都冇諗過，自己球隊可以行到黎呢個位置。但當一步一步走來，夢想，又好似離我地唔係好遠。上季嘅經歷話左比我地知，冇野係冇可能。而今季都有呢一隊波，佢地都係抱住一個nothing to lose嘅心態作戰。佢地叫做——般尼茅夫。


黎到七月尾，好多球隊組軍上都已經完成得七七八八，般尼茅夫都唔例外。今個轉會窗般尼茅夫可謂對症下藥，先以連附加條款可達1000萬鎊嘅價錢，收購英冠球隊列斯聯中場主力曲克（Lewis Cook）。再以1500萬鎊收購利物浦翼鋒伊比（Jordan Ibe）。

曲克（Lewis Cook）
伊比（Jordan Ibe）

收購伊比，最緊要係補充到球隊係邊線嘅突破力同創造力。因為球隊已經用1200萬鎊出售左主力翼鋒馬特列治（Matt Ritchie）去紐卡素，而同時球隊入面較具實力嘅翼鋒只餘史坦尼斯拉斯（Junior Stanislas），其他翼鋒嘅突破力同創造力都不足，故此收購係英超已經證明過自己實力嘅伊比，同史坦尼斯拉斯一左一右雙翼齊飛，的確令下年般尼茅夫嘅陣容變得十分可觀。更重要嘅係，可鋒可翼嘅約舒亞京治（Joshua King），可以專注發揮佢射門同走位嘅能力，同埋速度。
另外，更值得留意嘅係曲克。呢個生於1997年，年僅19歲嘅英格蘭中場中，看似寂寂無名，其實一直都有代表英格蘭青年隊參與國際賽事。2014-15球季正式成為列斯聯一隊成員，連同上季，出場次數以達80次，並有74正選，年青球員黎講，經驗十分豐富，不論防守同進攻都具有一定水平。雖然身材矮小，但其體能、速度都相當不俗，防守夠死纏爛打，進攻亦能夠擔當轉守為攻的角色。佢將會為球隊提供中場中路嘅即時戰力，倘若來季表現出色，將來會否仍在般尼茅夫效力，都係未知之數。

艾基（Nathan Aké）

般尼茅夫還向車路士借用上季在屈福特十分出色的左後衛艾基（Nathan Aké），三線實力得到上佳嘅補充。而球隊尚有哥林威爾遜，約舒亞京治，及阿科比，三者皆是速度奇高的鋒線殺手。以陣容黎睇，般尼茅夫大有參考上季李斯特城踢法嘅本錢，主打防守反擊，務求以中場快速運球到前場，再以前線快馬，望能製造「人少打人少」之勢。


上年李城球員都是寂寂無名，都是靠穩守突撃，都是靠速度高的翼鋒及箭頭。般尼茅夫有齊以上條件，下年要複製李城傳奇，並非不可能的任務。