【#世界盃】里奧力撐修夫基　「佢唔揀韋舒亞係啱架......」 精選

英格蘭今屆世界盃嘅大軍名單畀到球迷唔少驚喜，有好多新人入選，所謂新人事新氣象，好事定壞事就未知。不過呢支咁「fresh」嘅英軍，棄用一啲名氣較大但表現同狀態成疑嘅球員後，似乎都令唔少球迷感到驚訝。最心存疑問嘅，就莫過於韋舒亞嘅落選喇。

不過，里奧費迪南喺接受採訪時就講到，領隊修夫基喺世界盃決選名單入面剔走韋舒亞，呢個決定係啱架！究竟點解呢？

▲　　里奧支持修夫基決定。

里奧費迪南喺節目入面提到：「韋舒亞今季嘅表現明顯唔夠連加特同阿里咁出色，而且佢入波都唔夠多。」眾所周知，韋舒亞嘅職業生涯一直同病魔戰鬥，而「里奧叔」都認為，球員嘅健康狀況有可能會影響到隊友。

當被問到修夫基世盃決選名單係咪應該選韋舒亞，呢位名宿就話：「我唔係話韋舒亞唔應該入選，我只係認為佢仲未夠出色，如果修夫基想要一名進攻中場，咁佢可以揀連加特或者阿里，佢哋可以有入波同助攻嘅能力，相對地，韋舒亞嘅數據就冇佢哋咁出色。」

▲　　呢班往俄羅斯嘅客機，將唔會有韋舒亞嘅出現。

「所以我唔認同需要爭拗韋舒亞入選與否呢個問題，佢比賽得唔夠多，冇辦法喺一段長時間裡面保持出色嘅狀態。如果一名球員唔啱球隊，兼唔夠穩定，咁佢就會影響到球隊嘅發揮，可能令球隊失去信心。呢啲唔穩定嘅因素會一直存在喺球隊入面。」

「我認為佢仲未夠好，佢係咪有能力去擔任控球型中場？佢係咪會比今季嘅軒達臣更出色？而且陣中仲有熱刺嘅戴亞。所以其實關於佢係咪應該去世界盃嘅爭議聲音並唔多。」

今季韋舒亞為阿仙奴上陣27場，貢獻出1個入球及3個助攻，然而喺球會嘅表現並唔能夠成功吸引到修夫基嘅視線，最後落選世界盃名單。
來源：mirror.uk