【又係丹比利】法國超新星57秒破門　成今季歐聯暫時唯一攻入巴黎的人（有片） 精選

此「丹比利」不同彼「丹比利」！今個夏季轉會窗有世界第二高身價，由多蒙特轉投巴塞隆拿嘅奧士文尼丹比利，光芒四射，但今次受到注目嘅，就係另一顆耀眼嘅新星，來自些路迪嘅前鋒穆沙丹比利。雖然些路迪近年實力褪色，但屢屢喺歐洲賽踢出佳作。今場面對實力高幾班嘅巴黎聖日耳門，亦能夠攻破對方不失球金身！

▲　　入球嘅就係呢位穆沙丹比利！

▼　　入球片段：


呢球些路迪精心策劃一個角球攻勢，中場尼查姆開出角球，地波交到12碼點附近，前鋒丹比利衝前射門，皮球飛向遠柱，艾路拿撲救唔夠力，結果拍到都入！不足一分鐘，些路迪就能夠喺作客嘅情況下領先一比零。不過可惜嘅係，些路迪最終都唔能夠守到完場，仲要俾巴黎聖日耳門連入七球反勝，大敗一場。
賽果對本來出線機會已很渺茫嘅些路迪嚟講，其實唔算重要。重要嘅係佢哋證明自己，即使面對歐洲班霸，一班後生仔都係「初生之犢不畏虎」，成功打破巴黎聖日耳門今季歐聯清白之身！

▲　　穆沙丹比利出身自巴黎青訓！
球迷們未必知道，穆沙丹比利喺2004年開始加入巴黎聖日耳門青訓，16歲先至轉投富咸，17歲開始為一隊上陣，三季間替富咸上陣56場，2015/16球季為富咸攻入15球，因此吸引些路迪將佢收歸旗下，並旋即成為些路迪首席前鋒！

資料來源：Soccerway、leqeipe