【耆齡王】踢到50歲嘅仲有佢！中山雅史續約　喺J3繼續燃燒足球火！ 精選

之前三浦知良續約橫濱FC嘅新聞傳遍成個網絡，到近日川口能活繼續踢嘅消息亦受到大家關注，無他，只因為該一代嘅日本球星真係好經典。到今日（1月18日），另一位日本傳奇都宣佈繼續踢落去！日本J3聯賽球會沼津青藍官方宣佈，同年屆50歲嘅傳奇前鋒中山雅史續約！


中山雅史生於1967年9月23日，曾經效力磐田山葉及札幌岡薩多，喺J1射入157球，呢個紀錄曾經維持一段頗長嘅時間，直至2016年先至俾廣島三箭射手佐藤壽人打破。中山雅史職業生涯贏過亞冠盃冠軍及J-League聯賽冠軍，2012年，當時45歲嘅中山雅史宣佈掛靴，不過就喺2015年宣佈復出！

退役後，中山雅史喺2015年9月開始，於J3球會沼津青藍跟操，並隨即簽下正式合約宣佈復出，直至現在。現時，沼津青藍隊中仲有一名前日本國家隊成員，就係曾效力清水心跳嘅43歲中場伊東輝悅。

參加過1998同2002年兩屆世界盃嘅中山雅史，一共為日本國家隊上陣53次，射入21球。其中喺1998年法國世界盃分組賽對牙買加一役，佢射入日本喺世界盃決賽週歷史性第一個入球。亦曾經替國家隊贏得亞洲盃冠軍，並殺入過2001年洲際國家盃決賽。
而中山雅史亦係多項紀錄保持者，佢係目前國家隊比賽最快上演帽子戲法嘅球員，2000年2月16日對汶萊嘅亞洲盃外圍賽，只係用咗183秒就射入三球。另外，佢亦係連續上演帽子戲法場數最多嘅紀錄保持者，1998年4月，佢喺4場聯賽入面連續上演帽子戲法，4場比賽一共射入16球，係前無古人！

來源：GOAL.COM