[多奇出品] - 愛華頓對曼聯賽後檢討

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


曼聯今場先由迪基亞嘅嚴重犯錯令球隊先失一球,不過之後有般奴遠射追成平手,最後臨完場前愛華頓有球被判詐糊,結果1:1打和。我哋睇吓有咩可以探討:
一、當上半場落後同作客受壓之下,球隊進攻有咩不足之處?馬達經常被安排打後備其實喺咪浪費咗佢?

二、中場線喺換人前同後表現係點?

三、雖然迪基亞送大禮,但之後都有失波,咁後防線嘅表現係咪都合格?

一、今場攻擊線正選有般奴、馬斯亞同格連活特,而費特就幫手做中前場串連嘅工作。由於失波時間太早,令到大家都好心急,加上馬斯亞帶傷上陣同埋馬斯亞、格連活特、般奴默契未建立得好好,所以經常出現斷攬嘅情況出現。尤其係上半場般奴有幾球第一時間俾馬斯亞同格連活特,但佢哋都好似意會唔到咁,當交咗個波後,佢哋都未開始走位。小組涉入所俾嘅威脅唔夠大,撕破唔到對方後防線之下,就要靠兩邊出波同埋斬啲過頭波。可惜,球隊喺兩邊出波方面對比愛華頓就做得較差。左邊梳爾雖然主動出擊,亦都會同費特做小組傳波,但始終佢曾經斷過腳,帶波速度自不然會慢咗同埋唔會冒險做一啲單對單個人突破。而雲拜沙卡就同麥湯文尼同格連活特係完全無合作性可言,佢多數都係單對單面對敵人同出波,如果佢能夠同麥湯文尼,格連活特做吓叠瓦走位,咁就會更加活化右路攻擊。就算真係出到波,得格連活特同馬斯亞要喺身型高大兼打法硬朗嘅後衞得到優勢都難。
講真有咗般奴而無一個高大嘅前鋒去接應真係好浪費,雖然恩哈路屬於衝鋒陷陣型,但好明顯佢未修身同埋無論技術、控傳、射門同速度都仲係爭一個級別,好似臨完場嗰球近射,你可以話碧福特反應快,但我就話恩哈路個狀態同射門觸覺仲未返到去英超水平,我諗佢仲要踢多兩場比賽去操fit個態。另外,當蘇B下半場中段換入馬達後,雖然佢掂波次數唔多,但一掂波就有威脅俾到對方。尤其係完場前即彈俾般奴嗰腳,爭啲造成入波。不過,我個人覺得馬達係應該踢正選先發揮到佢威力,佢係一個中前場擅於組織攻勢嘅球員,組織攻勢係需要時間同埋要有波在腳。仲有要同隊友配合,而唔係好似一腳入波嘅前鋒只要一個機會就改變戰局。我諗蘇B可能希望擺馬達主力去打歐洲賽,所以英超比賽時間就出得比較少。

二、曼聯今場排三個防中,左邊費特、中間馬迪、右邊麥湯文尼。三個中場表現都相當唔錯,馬迪作為後防線前嘅一道屏障,無論係對方嘅地面或高空嘅傳送,有好多都被佢攔截到,而佢做轉守為攻同駁腳亦都做得稱職,傳球成功率高。當中有兩腳遠射亦都十分之有威脅,防守角球同樣出色。費特喺左邊主要做鋪橋搭路嘅工作,多次同梳爾做撞牆同埋般奴做小組,甚至走落底線傳中,但由於對手實力唔弱,表現冇上場對布魯日咁搶眼。麥湯文尼始終傷癒復出唔係好耐,狀態未去到十足。攻擊方面主要都係交橫傳波居多,而防守方面就表現得唔錯,無論企位定遮線都俾多正面嘅效果,應該高空波同防守角球亦都應付得嚟。
不過當蘇B抽走咗麥湯文尼之後,得費特同馬迪踢防中之後,成個中後場就亂晒。因為成場波馬迪都係鎮守中路,突然要佢打番左中場位置,佢一時間未適應到。中路需要嘅係企位準確同路數好,而左邊要兼顧埋跑動幅度,對馬迪依啲年紀開始大同體能下降得快嘅球員嚟講,要佢做調整係感到困難。費特今場本身傾向打進攻,換人後要拍住馬達兼做防守工作,對佢嚟講亦都唔容易。始於馬達防守比較差同埋費特前半場已經拍慣咗梳爾,突然要轉返做右邊拍雲拜沙卡,喺咁激烈同埋節奏咁快比賽,根本冇時間俾佢做調整。所以最後導致球隊右邊俾對手做突破同搏到罰球,左邊就不斷被對手出波空襲。

三、除咗迪基亞嗰球送禮,其實整條後防線都打得唔錯。最少見到今場後防個硬淨程度係高咗好多,防守角球差唔多都可以由自己隊友頂出個波。仲有連迪洛夫同麥佳亞好多時都唔會俾對手轉身。麥佳亞包波準、路數好,往往睇到同預計到對方下一步會點做,究竟係傳波定控波,然後作出適當嘅對應。連迪洛夫就硬淨咗好多,就算自己唔夠人搶身位,但都會盡量壓住對方,等佢哋唔可以輕易控到個波。而兩閘雲拜沙卡同梳爾係速度上都跟到對手同埋作出嘅攔截都好準確同快速。雲拜沙卡就單對單過佢係好困難,而且佢落腳都好準,所以蘇B未作調動前,根本就冇人可以過到佢,但當調動後,佢就同費特經常重叠位置,反而整亂咗個邊線。梳爾都係一樣,對方想以速度爆過佢就唔係容易,但當換走咗麥湯文尼之後,好多時梳爾同馬迪個位都重叠咗,之後換入威廉斯就更亂。好彩最後嗰球改變方向判詐糊。總體嚟講,後防表現算係合格。
最後,球隊得到般奴加盟實力的確增強唔少,但其他球員尤其係攻擊線技術始終唔夠全面,加上蘇B喺人腳調動方面做得唔夠果斷,如果要爭前四、足總杯同歐霸,唔係想像般容易。


============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
如欲購買曼聯官方產品,可到RS與曼聯官方網店United Direct合作的連結: http://bit.ly/royceud1
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


留言


請按此登錄後留言。未成為會員? 立即註冊
    快捷鍵:←
    快捷鍵:→