[月夜賽後短評] - 2023/24 英格蘭超級足球聯賽第二十場 - 森林 VS 曼聯

Royce Sports 曼聯.費格遜 一站式為您提供所有關於曼聯嘅一切, 您諗到嘅都有！ 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

⏹️全場小分析
2023/24 英格蘭超級足球聯賽第二十場
森林 VS 曼聯
全場完，森林2:1曼聯
2023年最後一日作客對陣森林，對手上仗大炒紐卡素3比1，今仗加上主場優勢顯然有實力能與曼聯對抗，睇返陣容名單，森林有前曼聯球員艾寧加倒戈踢右翼，而曼聯方面賀隆因病未能作賽，單箭頭由福仔頂上，加拿祖及安東尼依舊兩翼位置，中場沿用明諾及艾歷臣，左閘則繼續用達洛治頂替。

上半場開段森林比曼聯更為積極，特別於禁區頂位置作多番攻門，曼聯嘗試減慢比賽節奏及取回控球權但唔成功。6分鐘對手面對住兩名曼聯球員起腳遠射高出，11分鐘有前曼聯球員艾寧加左路落底傳中，華拉尼遞腳解圍彈向龍門，幸好只係門前越過差啲成烏龍球...其後曼聯採取防反戰術，但機會寥寥可數，反而大部份時間繼續被森林圍攻，31分鐘對手再於禁區頂燙射炒高出界，完半場前森林有幾次角球攻勢，不過威脅並唔大，奧拿拿亦及時單槌打出解圍，半場雙方互交白卷返入更衣室。
下半場坦克換入麥湯文尼，換走明諾位換位成關鍵，皆因麥湯並唔擅長踢單防中拖後，好多時都靠前插入禁區，而旁邊嘅艾歷臣亦只能派牌，變相禁區頂幾乎無人防守。初段曼聯漸漸站穩陣腳，54分鐘更有雲拜沙卡右路傳中，達洛治半月位接應勁射中柱彈出，弧度力度都有水準，可惜中柱彈出...不過63分鐘森林搵到機會，先於右路傳中至禁區頂，有人接應下撞射入網成0比1，麥湯見到橫傳時已經趕唔切回防...形勢偏向森林之際，中段77分鐘曼聯追平比數至1比1，加拿祖把握到對方門將傳失，第一時間落鏟攔下球權後推前橫傳交俾福仔，再撞射遠柱入網，不過只係對手偶爾犯錯送大禮，其實曼聯下半場有威脅嘅攻勢並唔多。

尾段兩隊各自加強火力，曼聯81分鐘有艾歷臣炮彈式遠射被門將擋出，迪亞奴試圖橫傳但禁區無人接應，其後森林隨即打反擊，右路艾寧加帶波推前後斜傳至禁區頂，有人接應並燙射破網，森林再次領先至1比2。補時階段95分鐘般奴禁區頂接應角球窩利抽射省中人彈向龍門，可惜對方門將反應快單手托出底線...最終曼聯係2023年最後一場英超比賽，作客輸森林1比2完場。
============
RS一系列鎖匙扣已登場，除左有曼聯歷來最偉大領隊費Sir外，仲有伊巴同迪神添，想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有！ 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/