[月夜賽後短評] - 英格蘭足總盃決賽 - 曼聯 VS 曼城

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

2022/23 英格蘭足總盃決賽 - 曼聯 VS 曼城
全場完,曼聯1:2曼城
終於迎來本賽季最後一場賽事,足總盃決賽對陣同市宿敵嘅曼城,可謂另類嘅英超打吡戰。先講一講兩隊今季嘅對碰,開季曼城曾經6比3大炒曼聯,幸好賽季只係啱啱開始,季中時間曼聯主場則以2比1勝出比賽,經過幾個月嘅調教後曼聯整體實力都有上升,比起上季慘不忍睹嘅表現要好得多,當時嘅福仔更係每場比賽都有入球進帳。

足總盃決賽兩隊再次碰上,賽前外界一致都睇高曼城一線,皆因曼城無論係戰術執行,球員表現、個人技術、埋門把握力甚至整體表現等等,唔少球迷都認為曼城係較為出色嘅一隊,且新舊球員經過今季磨合之後表現均有發揮出水準,所以係贏面較大嘅一隊。事實上哥迪奧拿調教曼城已經來到第七年,而曼聯今季啱啱起步,坦帥接手嘅第一季就要面對住中前場逼搶、控傳戰術體系相當成熟嘅曼城,就好似一位新人面對同行嘅老大哥,要砌低老大哥絕不容易,必須迎難而上。但曼聯並非完全無得踢,季中都贏過曼城,且一場過嘅比賽所有事情都會發生,且論士氣及鬥心,曼聯從不輸蝕,加上賽前唔少前曼球員都有開post表態支持球隊,看台上亦有碧咸、費Sir等人以及眾多曼迷支持,所以希望每位曼聯球員都交到功課,最好當然係贏埋曼城奪冠啦。正選陣容方面,賽前指馬斯亞因傷缺陣,安東尼又未能及時復出,前場靠福辛兩人,中場治用四名中場球員,般奴、艾歷臣、卡斯米路及費特,而後防線則無改動,睇得出坦帥賽前都有作出針對性部署。

勢估唔到上半場開波唔夠20秒,曼城嘅第一次攻勢及射門就取得入球,先來自門將奧迪加嘅大腳傳前,迪布尼頭鎚爭頂二傳,根度簡禁區頂接應見到中間有空位空出,一腳絕妙窩利抽射入網成0比1,曼聯後防線走漏根度簡,迪基亞有嘗試向左移但無作出撲救,就係咁曼聯早早落後一球,坦帥面色都唔多好睇...之後曼城繼續保持進攻,3分鐘一次罰球攻勢,近柱有洛迪頭鎚頂中斜出,迪基亞同樣無反應,5分鐘曼聯猜唔過半場,基亞利殊接應短傳一推再射斜出。到20分鐘前兩隊互有攻勢,不過曼聯攻唔入對手禁區範圍,相反曼城16分鐘及20分鐘均有相當具威脅嘅攻門,都係來自夏蘭特,先係門前接應傳中右腳一篤被迪基亞沒收,再來係左邊壓過華拉尼左腳勁射高出。中段曼城選擇稍為拖慢節奏,無作出太多中前場逼搶,令曼聯有機會奪回控球權並組織攻勢,23分鐘卡斯米路傳中後,福仔禁區內頭鎚一頂頂出界,但算係曼聯攻勢上一個好嘅開始。其後28分鐘曼聯終於搵到機會,般奴吊傳俾後上嘅雲拜沙卡,試圖頭鎚二傳頂中基亞利殊隻手,球證接近成分鐘後先叫睇螢幕,經VAR後球證指基亞利殊禁區內犯手球判罰十二碼,並由般奴主射入網追平至1比1,睇返慢鏡基亞利殊的確舉手過高。直至半場完,雙方各有攻守但未有再拉開記錄,半場以1比1返入更衣室。上半場雖說曼聯攻勢唔多,但坦帥分別用費特及華拉尼man mark曼城兩大進攻點迪布尼及夏蘭特,效果唔錯,迪布尼幾乎無機會作出致命傳送,夏蘭特又缺少供應無法攻門,而且中場放上四名球員令曼城唔能夠輕易於中路組織。但略縑坦帥忽略另一位中場球員根度簡,特別係今季下半季嘅根度簡表現強勁,把握力及技術都無容置疑,上半場多次於禁區頂製造威脅...

下半場開段明顯見到哥迪奧拿作出戰術調整,吩咐兩邊翼鋒拖後半格至一格,開始將進攻重心放到兩邊邊線位置,同時迪布尼及根度簡都盡量拉闊,以便滕出空間入攝禁區製造攻勢,應對坦帥用四名中場球員堵塞中路,使得曼城無辦法於中路推進嘅方法。隨後50分鐘曼城憑著根度簡梅開二度再次取得領先優勢,先係迪布尼右邊邊線被費特kick跌獲得罰球,迪布尼開出罰球後,禁區頂有根度簡接應又再窩利射彈地波彈入成1比2,迪基亞嘗試撲救但唔成功,曼聯再度落後。到中段時間62分鐘曼聯換入加拿祖換出追唔上節奏嘅艾歷臣,辛祖放回右邊,希望以加拿祖作為左路突破點。加拿祖落場後表現亦都亮眼,多次於中尾段時間從左路落底線傳中以及自己起腳,可惜無功而還。70分鐘曼城食詐糊,基亞利殊左路橫傳俾夏蘭特撞射,先被迪基亞救到,又係根度簡入攝門前補射入網,幸好虛驚一場,旁證舉旗指越位在先。最後尾段時間曼城漸漸縮後想守住戰果完場,另一邊廂曼聯火力全開,換入韋賀斯及麥湯文尼,換走表現平庸嘅辛祖及連迪洛夫放手一博,尾段曼聯最有威脅嘅攻勢莫過於韋賀斯及麥湯文尼先後頭鎚頂中柱及被奧迪加托出底線,差啲追平曼城...但最終都攻破唔到曼城大門,一場非常緊湊嘅比賽曼聯以1比2輸俾同市宿敵曼城,失落足總盃冠軍,同時宣佈本賽季正式完結,更深一層嘅意義係唔能夠親手阻止曼城成為三冠王,只能寄望國際米蘭擔任劊子手...

睇返今個賽季,賽程非常緊湊,曼聯四線作戰,一開始幾場被對手大炒再贏阿仙奴利物浦。中間快車曼聯如魚得水得到聯賽盃冠軍,到下半季相當驚險,幸好提前一輪守住前四獲得歐聯資格,可惜失落足總盃冠軍。總括曼聯整體表現比起上季有明顯進步,開始有一套有板有眼嘅戰術體系,坦帥及教練團隊攻不可沒,球員亦值得加許。今季曼聯守得住前四已經達標,中間更奪得聯賽盃冠軍,達標有餘,雖然今場足總盃決賽輸俾曼城,但唔好灰心,唔好忘記只係坦帥嘅第一季,來季曼聯必定會更好,前提下夏季轉會窗嘅轉會操作及格拉沙賣盤一事能夠順順利利。


============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

留言


請按此登錄後留言。未成為會員? 立即註冊
    快捷鍵:←
    快捷鍵:→