[多奇出品] - 能讓贊奴沙回來嗎?

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


曼聯自從普巴受傷之後,只得般奴支撐成個攻擊線底下近5場只有2勝3和,距離爭標路途越嚟越遠。前鋒線表現可謂慘不忍睹,格連活特同馬斯亞表現比上季大跌,只有福仔係踢得較為理想,而翼鋒丹尼占士尙有進步空間,所以筆者認為蘇B與其買辛祖,點解唔試吓回購或買返喺皇蘇有出色表現嘅贊奴沙返嚟呢?
贊奴沙16歲嘅時候就由比利時球會安德烈治過咗嚟曼聯,喺2012-2013年賽季被費格遜提拔到一隊,喺費sir退休後最後一場比賽對西布朗時被列做後備席,而2013-2014年首循環作客新特蘭梅開二度,以2:1反勝對手,成為繼雲佬後,第二位能夠喺英超第一次打正選就入2球嘅曼聯球員。
贊奴沙適唔適合打番曼聯相信會有好大爭議,筆者嘗試從正反兩個角度去睇:

正:贊奴沙話過喺依家嘅職業生涯入面最大遺憾就係效力曼聯時,佢希望可以再為球隊出賽,爭取好成績。依個為球隊比賽嘅動機同渴望係其他年青球員需要學習,亦都可以藉此帶動佢哋腳踏實地去努力。其次,贊奴沙嘅成長經歷亦都值得班年青球員尤其係早成名嘅作借鏡。早成名嘅球員如果經歷失敗唔係咁容易可以爬番起身,球隊曾經有幾多年青球員成名後,可以繼續保持到個勢?就好似馬捷達、韋碧克咁。贊奴沙都經歷過外借去多蒙特同新特蘭等球會可惜被棄用,今次可以喺皇蘇重回正軌,對佢嚟講係個非常寶貴嘅經驗,除咗幫助自己成長,亦都可以分享經驗俾隊友。最後,就係球隊正正需要翼鋒。翻睇贊奴沙效力皇蘇片段,擅長打翼鋒嘅佢,喜歡用左腳打右翼,但有時又會打左邊,左右腳都非常純熟,而且可傳可射。喺西班牙聯賽浸淫咗一段時間,令佢嘅技術更上一層樓,依家曼聯正正需要擅長助攻嘅隊友餵波俾前線。
反:首先喺西班牙聯賽成功唔代表喺英超取得成功,始終英超比賽風格碰撞異常激烈,贊奴沙係咪可以應付到守衛兇狠嘅攔截成為佢能否立足嘅關鍵,而且英超後衛出名爛打,贊奴沙又可唔可以咁瀟灑過到班後衛呢?其次,馬斯亞、福仔同格連活特踢波風格比較難夾,佢哋經常帶住個波死去,而且傳波仲有進步嘅空間,再加上馬斯亞同格連活特狀態跌得太犀利。另外,佢哋三個攻擊球員嘅高空波同搶點射門都比較弱,就算佢傳到啲質素高嘅傳中球亦都未必有隊友接應到,所以贊奴沙返咗嚟之後會唔會變成第二個占士呢?最後,蘇B係咪覺得自己需要贊奴沙呢?領隊首選都係想要辛祖,球隊願意等佢成年,等到一個好嘅價錢先出手。如果勉強買佢番嚟咪變成第二個雲迪碧克,筆者唔想再見到依個情況再出現。
唔知依個想法會唔會有啲天方夜譚呢?而且足球世界係非常現實,所謂適者生存,贊奴沙雖然想返嚟,但未必所有人都會接受。最後都係一句,希望贊奴沙可以好好享受足球比賽。


如果大家仍然未申請或想申請NowTV黎睇波,呢條連結有月費低至HK$268.00再有野送嘅計畫益大家:
➡➡bit.ly/RSNowTVSpecialOffer

============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

留言


請按此登錄後留言。未成為會員? 立即註冊
    快捷鍵:←
    快捷鍵:→