[多奇出品] - 雲尼斯杜萊的離隊是否太早?

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


對曼聯迷嚟講雲尼斯杜箂喺大家心目中係一位出色嘅射手,踢咗150場英超入95球,當中有96場勝利,得勝率有64%,喺嗰段球員變動比較大嘅時間(即係2001-2006年)個得勝率已經係非常高。雖然最後佢因為同C朗、費sir鬧不和而俾球會賣走,但如果球迷係當時話事人,你哋會放走佢定係會留佢喺度為球隊爭取更多奬杯呢?
話説喺2006年世界杯之後,雲佬同費sir關係開始好轉,但因為球會接受咗皇馬嘅報價,所以就以1500萬歐元賣俾佢哋,費sir當時惟有接受。依家諗翻雲佬喺曼聯最需要佢時,佢就為球隊搏命爭取入球,到有咗C朗、朗尼後球會就因為佢同費sir嘈而被賣走,筆者認為佢嗰時應該可以繼續為曼聯打江山。
依家不如從佢嘅個人心態同技術、踢法同埋5年曼聯生涯簡略回顧,去睇翻佢係咪值得繼續留喺曼聯:

一、個人心態、技術。雲佬係一位典型嘅「禁區殺手」,佢嘅射門觸覺非常敏銳,究竟咩叫射門觸覺呢?首先係對入球嘅渴望,將依個渴望化為本能需要嘅一部份,就好似人需要飲水咁。如果嗰場比賽入唔到波,個感覺將會比死更難受。其次就係決心,要有決心去製造每一個射門機會,然後盡自己所能去把握。把握機會即係起每一腳最低限度都需要中龍,中龍先至有機會取得入球。最後係要俾到個威脅感龍門,就好似一個殺手走埋去被害者身邊,未郁手已經俾你嚇到跌咗落地。雖然講起上嚟好簡單,但做就難好多。講完射門觸覺,然後就講雲佬嘅入波前準備,由於雲佬被定型為「禁區殺手」,每一個守佢嘅球員一定已經有防備佢嘅心,只要佢有咩舉動都會觸動到守衛嘅神經,所以佢所做嘅每一個動作、決定同射門都要係近乎完美,先至可以喺咁嚴密防備低下入波。咁點為之近乎完美?就係快、狠、準。動作要快尤其係起跑嘅第一步同埋起腳射門(左、右腳平衡力要好)。狠唔係指要打茅波,而係要有勁度同做決定要決斷,盡力去壓過守衛製造機會,當然射門都要一樣,等龍門完全無反應。準係指控波到位同埋射門要食正個波,令到自己可以減少多餘動作之外,每射一球都中正目標。相信如果要做得到以上嘅條件,唔係話踢一、兩季就可以。
二、踢法。依度可以分兩個步驟。首先係製造射門機會嘅方法,之後就係處理最後一腳嘅方式。喺製造射門機會方面,分別有突破越位單刀、以體力壓過守衛、突然變速或加速走空位之後隊友就橫傳俾佢射入同頂頭搥、隊友射門中柱或俾龍門擋出然後執死雞、仲有可能一扭二或三然後射門(狀態好嘅時候,例如2002-2003年主場對富咸3比0嗰場),仲有當然唔少得射十二碼,所以話如果要讚佢嘅射術,不如先讚佢點樣製造機會同接應隊友嘅傳送先,佢往往可以憑以上方法製造單對單面對龍門機會或者半空門狀態。要做到依點當然要準備動作做得好,隊友交個波俾佢前,佢已經諗定點樣轉身同擺脫後衛,例如:佢左右邊轉身都做得好順。此外,佢控高波同彈地波都好在行,好多時控一腳就可以即時射門,去唔到就俾翻隊友唔會浪費時間,佢有時要背向對手爭位時就用體力去壓過對方,撕破對方防線。所以佢點解咁難防守就係咁,佢可以按情況用速度、力量同靈活性去應付唔同類型嘅守衛同突破越位。而處理最後一腳方面,佢無論係咩位置,單對單對住龍門或者空門都會射出急勁同有角度嘅波,務求令入波命中率有接近100%。佢比較少射啲通大細龍門或者射龍門手邊嘅地波,佢單刀傾向射中腰偏上嘅角位波,有時仲會扭過龍門同挑射。仲有佢射十二碼偏向射左邊角位,係擺到明射左邊,就算係龍門知道都撲唔到嗰隻,佢直至到2003-2004年球季主場對保頓先至射失過一球12碼。根據非正式統計,雲佬射過34球十二碼,入咗29球,命中率大約有85%,當中入嘅29球裏面射左邊、中間同右邊分別係19、2、同8。而佢喺曼聯生涯射入150球,單刀射入約25%、橫傳俾佢射入約24%、12碼約20%、頭搥約14%、執死雞約8%、其他約9%,當中有1球係遠射,係2005-2006球季作客對查爾頓所射嘅一球。
三、曼聯唔係因為依5年都有好大球員變動,可能雲佬所贏得唔只1次聯賽冠軍、1次足總盃、1次聯賽杯同埋一次社區盾。依家簡略地回顧佢喺曼聯足球生涯。

2001-2002年,曼聯攞季軍,歐聯四強止步。聯賽入87球,失45球;攻力排第一、失球排第六少,嗰年雖然攻力強勁,但防守力弱。史譚突然被買走,臨時買入白蘭斯,成個防守線默契不足,加上巴夫斯多次失誤,令到球隊入波多極都唔夠輸。雲佬當季喺英超就入咗23球,歐聯入10球,仲做埋歐聯神射手。佢喺主場對修咸頓嘅賽事第一次連中三元,佢亦都喺主場對布力般射入第一個十二碼。

2002-2003年,曼聯攞冠軍,歐聯八強止步。聯賽入74球,失34球;攻力排第二,失球排第一少,嗰年攻力依然強勁,因為雲佬狀態好同埋同班攻擊球員建立默契,防守加入李奧之外,加上後防默契漸漸建立,巴夫斯又少咗出錯,所以失球數字太減。雲佬當季喺英超入咗25球,歐聯入14球,成為英超同歐聯神射手。當中射咗12個十二碼全中,仲有主場對富咸由中場單騎一扭三射入龍門最經典。
2003-2004年,曼聯攞季軍,歐聯十六強止步。聯賽入64球,失35球;攻力同失球少都係排第三,嗰年太多新人加入,有候活、C朗、迪贊巴、費查、貝利安、基巴臣同沙夏,默契有待建立,加上碧咸同華朗離隊,李奧藥檢失敗要罰停賽8個月,令到陣容雪上加霜。雲佬當季英超入20球,歐聯入4球,足總盃決賽對米禾爾梅開二度,攞咗足總杯冠軍,不過,嗰季主場對保頓射失第一個十二碼。之後主場對阿仙奴主射十二碼又射失,完場後仲要俾對手嘲笑。
2004-2005年,曼聯攞季冠,歐聯十六強止步。聯賽入58球,失26球;攻力排第三,失球排第二少,嗰年因為雲佬受傷3個月,加上朗尼、阿倫史密夫等新球員加入,令攻擊線需要重組同磨合,亦都因為咁,雲佬喺前鋒線嘅重要性開始下降。當中雲佬侮辱C朗事件嘅出現,令佢同費sir關係開始轉差。不過佢喺歐聯都入咗8球,成為歐聯神射手,而聯賽就入咗6球。

2005-2006年,曼聯攞亞軍,歐聯分組賽出局。聯賽入72球,失34球;攻力排頭兩名,失球排第四少,嗰時雲佬仲可以保持個狀態,聯賽入21球,不過佢喺球隊重要性已經降低,因為沙夏、朗尼、C朗依個攻擊鐵三角已經開始成型,根據非正式統計,佢哋分別入咗16、18、同12球,而助攻數字亦都有4、、9、同7次,加上朴智星都有8次,雲佬只係得3次助攻。喺聯賽杯對韋根嘅比賽,球隊領先4比0時,費sir甚至冇俾雲佬後備落場,令到佢哋關係正式破裂。而依季作客對保頓嘅入球成為佢喺曼聯嘅最後入球。
筆者睇過晒2001-2006年回顧之後都明白雲佬點解咁唔鍾意C朗,當時嘅C朗鍾意賣弄腳法又周不時插水,傳啲波非常急勁而且刁鑽同埋經常浪射,加上雲佬曾經同碧咸、傑斯、史高斯、華朗同蘇B依啲傳波高手做過隊友,你話點會唔火滾。到後來C朗到2005-2006年球季開始成熟時,就發覺兩個人有爭位踢爭波射嘅情況出現,依啲係咪叫「一山不能藏二虎」呢?無論點都好,佢都曾經為曼聯拼盡全力,每分每秒都毫無保留,所以當世界盃之後佢冷靜落嚟,球隊係咪仲應該俾佢離開呢?當然呢個已經係改變唔到嘅過去,但雲佬嘅離開係一個可惜,包括球隊及喜歡睇入波嘅球迷。



============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
如欲購買曼聯官方產品,可到RS與曼聯官方網店United Direct合作的連結: http://bit.ly/royceud1
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


留言


請按此登錄後留言。未成為會員? 立即註冊
    快捷鍵:←
    快捷鍵:→