[K11 出品] 曼聯K角度-曼聯仍然欠缺的元素

本人K11, 首次同大家見面, 出道文章就正正係一場曼市打吡, 賽果大家都知道, 係一場雙方都交白卷賽事, 但呢場賽事, 係咪每位曼聯球員都係一份白卷呢?非也, 就等我地黎睇清睇楚!
相信迪基亞本人賽前都未料到會如此空閒, 今場多得阿古路及施華受傷, 加上托尼狀態不足, 曼城攻力大減, 加上今場曼聯一眾防守球員既穩定演出, 迪基亞可以做今場既其中一個最佳觀眾! 後防方面, 前輩教落, 睇住支持愛隊直播既你, 如果睇到連一對中堅守將都偶爾忘記係咩組合, 其實是褔,証明愛隊後防無犯大錯, 對手攻勢欠奉, 令中堅出鏡率極少, 今場正正如此, 史摩寧及鍾斯呢對拍檔今場所受壓力不大, 是白卷嗎?邦尼都唔係易應付既前鋒, 但正如搶籃板一樣, Box- out (最近重看入樽漫畫), 將進攻既一方拒於籃底之外, 防守籃板便是囊中物, 一對中堅基本上將邦尼既觸球範圍推至禁區與中圈之間, 一旦皮球進入接近禁區邊範圍, 眾後防會採用緊迫防守, 基本上隨左遠射, 都難以威脅迪基亞, 而有點意外既係, 華倫西亞及盧祖面對史達寧及迪布尼既然毫不吃力, 華倫西亞更有多次反爆高拉洛夫之景象, 難得難得, 可惜華倫西亞賽事尾段受傷離場……..

中場方面, 似乎雲帥經過敗於阿仙奴一役後更加明白到, 如非傷患停賽, 小豬及卡域克, 於中場中路, 二個只能活一個, 其實觀乎二人既年紀, 咁樣對佢地似乎更加合適吧, 而今場雲帥選用小豬, 似乎看中佢既中場中既掃蕩力, 鬥志及經驗, 而放棄可以交致命直線既卡域克, 實屬明智, 曼城中場中路及後防中路, 並不是如此輕易被直線劏穿, 與其硬碰硬, 倒不如用二翼進攻更加合適, 前一格由左至右既係馬素爾, 靴里拉及馬達, 馬素爾似乎對於左翼位置應付有餘, 多次既突破, 始終成為中前場最有威脅既一員, 而靴累拉既連貫中前場能力, 入禁區時間都恰到好處, 本身技術不容置疑, 但如果可以鍛鍊一下身體質素似乎更好, 馬達近仗無之前幾仗咁sharp, 但其實狀態唔差, 只要維持現時既狀態, 再等待下一次既耀眼吧, 後備換入既費蘭尼, 其實往往都能夠發揮到佢應該發揮既能力, 禁區內頭鎚二傳俾史摩寧攻門既一球, 明顯可於適當時發揮作用, 而年青人連加特也有一種帶俾球賽新鮮既感覺, 給點時間吧。
去到現時最關心, 最多話題既正前鋒朗尼身上, 自從2011/2012季度後, 其實朗尼狀態有慢慢下滑既情況, 從入球數字更加明顯, 儘管雲帥接手後既曼聯, 佢多年前要求既前鋒位置都全力配合, 可惜上季全季37場只入14球既前鋒成績表的確令人擔憂, 但作為隊長既佢, 感染力依然, 亦都會回防參加防守都值得欣賞, 耐可, 前鋒最緊要既就係入球, 從馬素爾(暫時各賽事總數5球)加盟後數仗總入球數字已經跟朗尼(暫時各賽事總數6球 – 其中3球為作為布魯日既歐聯外圍賽 )只差一球, 要考慮馬素爾近仗被安排於左路, 其實數據上已經高下立見, 今場比賽, 未能於前場控制皮球, 等待隊友既支援, 本人玩開既業餘波, 正正就係前鋒位置, 前鋒, 要背向球門踢球, 未入禁區前, 最重要既, 就係將中後場隊友傳黎前場既皮球控制, 保護, 回傳於後上既隊友或左右翼既隊友再進攻, 一層一層滲透, 一旦控制唔好, 皮球被對方後防搶奪或自己控失失去控球權, 對於進攻一方係相當洩氣, 而當進攻一方可以將皮球送入對方禁區, 鬥心夠, 肯搶點, 決斷既處理 ( 有點懷念小豆 ), 現時既朗尼可能於近季太多回中場, 失去左果種前鋒要有既”火”, 朗尼要既唔係休息, 而係更多既比賽讓佢重燃2011/2012季度42場攻入32球既”火”, 目前曼聯仍然欠缺既元素, 正正就是這個前鋒的”火”。
K11 的話 :周中既聯賽盃16強賽事, 某程度上, 我希望雲帥可以俾迪比重新振作既機會, 只要調整好心態, 發揮到PSV既能力, 雲帥可以多一個選擇, 讓馬素爾重回正前鋒位置, 帶回這個位置上要既一團火 ( 雖然馬素爾於場上冷靜得令人驚嘆 )。

仲唔快d Like 我地個page?
https://www.facebook.com/RoyceMU

如果喜歡我們的文章,請即分享到︰

標籤: 朗尼  馬素爾  曼城  迪基亞  曼聯  

留言

會員
我要評論
請按此登錄後留言。未成為會員? 立即註冊
  • ric chung
    ric chung 於 27/10/2015 評論 NO. 1

    仲要比朗尼更多比賽?到時候真係有大把火,係其他球員火都黎同埋球迷眼火爆!

快捷鍵:←
快捷鍵:→