[K11出品] 曼聯K角度-4-2-4-0下的0比0賽事


各位哈佬喂快樂, K11已經第三次同大家見面, 無獨有偶, 已經連續3場0比0了, 係咪我黑住曼聯呀? 咪咁迷信啦, 今場既戰況與賽果, 其實我並不敢意外, 先咪話我事後神先, 睇埋落去啦, 其實我今季都有留意水晶宮既比賽, 柏祖按手上既班底, 踢出適合既戰術, 中下游最佳戰術 – 防反, 後防收窄, 用一個卡比耶做派牌, 前面3個採用快速突擊, 擅突破既沙夏, 賓捷安, 保拿斯, 前線用了基恩, 此戰術專用黎對付一些喜歡控球在腳, 組織打入對方後防既球隊, 由於後防收窄, 只要防守球員集中精神, 失波唔會太多, 一旦對手久攻不下, 未能突破自己防線, 即交予卡比耶或直接給擅突破既3名球員, 向前自爆, 如果前線既基恩換成擅長禁區執雞既前鋒殺手, 例如小豆 ( 唔好再提喇…..), 呢隊水晶宮真係會好危險, 從今季每場唔會淨輸多過2球就知道, 其中曾擊敗車路士, 而只淨輸一球下敗給曼城/阿仙奴/熱剌, 睇到呢度, 用心了解今季曼聯既球迷就會即時明白, 曼聯好大機會被水晶宮食到, 結果, 今場既賽事數據可以引証我既說話, 控球比率, 曼聯曾經佔7成, 最終約5成, 但射門次數, 水晶宮有13次5次射中龍門之多, 而曼聯只得6次1次射中門既射門數據, 角球水晶宮有7次而曼聯只得3次, 角球多既球隊多有2類, 快速突擊, 直接了當攻門, 目的以對手底線爆落去或完成射門為目標, 睇到呢度, 明白呢場波既戰況已經係預期之內了吧? 但曼聯前線既問題越黎越嚴重, 我地一齊黎睇下呢個新陣 – 4-2-4-0吧! ( 睇波小貼士: 排陣名稱例如4-4-2, 4-3-3以場內10名球員為數目, 由後防線-中場線-前場線以數字代表陣容安排既人數而名, 由於龍門是必須既位置, 所以唔會加進排陣名稱內 )


龍門復用正選迪基亞, 此子雖然今仗受真正威脅唔多, 但其中一球救出保拿斯既抽射後中楣可謂尤關重要, 其餘時間, 水晶宮既皮球多以龍門前橫飛為主, 後防方面, 鐘斯連後備都無, 希望只係雲哥爾為準備歐聯賽事而做出既輪換, 今仗賽事跟周中對米堡既聯賽盃賽事採用相同既後防線, 明顯水晶宮既戰鬥力比米堡高一級, 曼聯後防其實風聲鶴唳, 只係水晶宮真係有威脅既組織及攻門不多, 但達米安明顯被沙夏多次爆破, 因而取得一面黃牌, 結果到66分鐘便被楊格入替, 除左防守此類向前突破既快速球員有問題外, 更令曼聯進攻方面, 少了一度板斧, 之前已提及, 水晶宮喜將後防線收窄, 要對付此類防線, 最佳既方法係2翼拉邊, 將對手後防球員拉出禁區, 令中路有更多空位, 而曼聯於右路進攻既球員為馬達, 不是落底線或拉邊既球員, 如果由華倫西亞出任右閘, 相信可以拉出水晶宮後防線一定既空間, 可惜上場聯賽對曼城尾段傷出, 結果今仗只能用迪米安, 緊記迪米安不是不好, 佢既水準穩定, 但面對此類擅高速突破既球員的確有點難度, 及後換入既楊格, 雖然第一腳既傳中球做出底線傳底, 但有留意我上篇文章既讀者都知道或明白, 楊格成為曼聯有效既補給力, 左閘, 左翼, 右閘都曾出任了, 不叫優異但好洗好用吧。




中場方面, 相信由我第一篇文章開始留意既讀者都知道, 舒拉達連配以小豬/卡域克係我首選既中場線, 今仗雲帥便正正如是, 而用小豬都非常適合, 水晶宮既戰術係直接, 咁應付此戰術既最佳防守就係於中間封鎖其直接既路線, 卡域克既活力未必足夠, 費蘭尼既防守視野未必勝任, 所以小豬便是最佳既人選了, 舒拉達連今仗唔突出, 但同小豬既防中屏障絕對合格, 其後換入既費蘭尼只係位置既更換, 表現平平, 再前一格, 又係馬達, 靴里拉加馬素爾既進攻中場線, 馬達及靴里拉聰明既踢法, 控球等等, 作為想學習進攻中場既球迷黎講, 其實已經賞心悅目了, 可惜既係2者既身型始終較單薄, 如果太密密麻麻, 始終對其2者表現有一定既折扣, 更可惜既係靴里拉其中一球接應馬素爾既射門撻Q, 而馬素爾, 今仗大部分時間繼續出任左翼, 仍然係最有威脅既球員, 其中一球推橫交出致命直線, 可惜朗尼未能把握, 其後賽事中後段轉回正前鋒位置, 可惜時間已經不足夠令其做到應要做既事, 而且我開始感到佢帶有一點點既疲態, 雲哥爾要小心留意了, 另外後備換入既連加迪, 今仗表現一般, 不過不失吧。


前線球員, 朗尼, 表現繼續令人失望 ( 以一名前鋒黎講 ), 今仗朗尼有一次罰球中框, 一次遠射高出, 表現好了點嗎? 你有否看到朗尼接應馬素爾直線既跑動嗎? 很慢了吧? 作為一名前鋒, 動作其實有點生硬, 係狀態不足? 還是壓力太重跑不動嗎? 朗尼於楊格換入之前, 都正正係正前鋒既身份, 但我留意到既, 係佢多次回中場拎波, 再留意一下, 角球既時候, 朗尼既位置, 係禁區外, 我看到既, 朗尼係一名進攻中場, 會回防既中場, 若果對手係防仙奴, 曼城等等既強敵, 幫手回防, 回中場拎波, 可以理解, 但水晶宮既話, 就算回中場拎波, 都只係駁下腳, 之後會返回前鋒位置, 但朗尼多次回後拎波後, 跟進既位置, 似一名進攻中場……….咁邊個入禁區搶點, 攻門呢? 現時既朗尼, 連遠射都少之有少, 似墜後於C朗既朗尼, 墜後於雲佩斯既朗尼, 但呢個朗尼, 已經無左信心………….我地試試唔好好似只盲目針對朗尼, 看罷各競爭對手既前鋒既情況, 再想想吧!
曼城 – 阿古路, 相信即使係曼聯球迷都要對阿古路作為前鋒既身份報以稱職既掌聲, 禁區內既把握, 突破能力, 遠射都係世界級
利物浦 – 史杜歷治, 雖然帶有一點獨食, 但其把握力, 射門慾, 某程度上就係我曾經提及”前鋒既火”
熱剌 - 哈尼簡尼, 同是英格蘭人, 同樣經常回後拎波, 但其射門慾, 射手既觸角, 以英格蘭球員黎講, 的確係未來之星
阿仙奴 – 基奧特, 雖然擅射高難度射門, 但其柱躉式踢法, 明顯以定球後再入禁區接應為主
觀乎主要競爭對手既正前鋒, 即使回後拎波, 為既係令對手後防難以捕捉, 希望找出空位, 或令球隊傳送上更加流暢, 一旦回後成功控球, 多會快速交給中場球員再派牌, 自己走回前線找尋機會或空位, 相反朗尼回後拎波後, 多會自己派牌, 之後留於進攻中場位置幫手組織, 但因此既影響………..一黎跟馬達/靴里拉位置重疊, 二黎仲有邊個入禁區呢? 對手後防中路所受既威脅及壓力便大大減低了。
我無偏心, 都唔會見高拜, 見低踩, 點解無提車路士既迪亞高哥斯達? 其實大家覺唔覺, 近排迪亞高哥斯達既表現, 跟朗尼好相似? ( 只論球場表現, 非指球品 ), 只係朗尼回後拎波, 增加曝光率, 感覺較好一點, 今仗既朗尼, 有某段時間, 更似小豬既踢法………我地要既前鋒是這樣的嗎? 現時既朗尼變成了雞肋, “出之無用, 棄之可惜”, 最能幫到現時朗尼既係佢自己及雲哥爾, 可惜雲哥爾都一定受著壓力, 向無特別情況下, 棄用球隊隊長, 更是英格蘭隊長及正選前鋒, 將馬素爾放回正前鋒位置, 左路改為楊格/迪比,, 一定會有很大既聲音及壓力, 也會影響球隊士氣, 但不解決, 連續3場比賽0比0既戰果以一隊爭標球隊黎講, 根本不合格, 將朗尼放於左路, 不見得比楊格/迪比好, 將朗尼放於進攻中場, 難度棄用創造力足夠既靴里拉? 如何處理呢? 仲有3日時間俾雲帥準備下場歐聯賽事, 到時可能會有一些啟示。

比賽日我地會po 直播 link 比大家睇波, 記得留意我地既page!
https://www.facebook.com/RoyceMU
仲會有賽後評分,精華,個人精華等,仲唔快d like?

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • woody1688
    woody1688 於 01/11/2015 評論 NO. 1

    我覺得打雙前鋒有得諗下 反正朗尼作為前鋒其實做既野似進攻中場打法

  • blackteg
    blackteg 於 02/11/2015 評論 NO. 2

    好認同筆者對郎尼的分析。完全唔係一個射手要有的態度…仲要話自己要打最前。禾確特比佢更似前鋒!

  • ric chung
    ric chung 於 02/11/2015 評論 NO. 3

    其實5棄用佢會5會壓力仲大?朗尼踢正選只係用黎掩飾v92既無能,佢既所謂戰術,換人,排陣都好有問題,1成不變最合適形容v92

  • ric chung
    ric chung 於 02/11/2015 評論 NO. 4

    不過依家全世界矛頭直

  • ric chung
    ric chung 於 02/11/2015 評論 NO. 5

    矛頭直指朗尼,5多人留意到最大問題係v92!作為1個專業既球員,無得出場可以表示不滿,但係正選上場絕不能拒絕(受傷除外),安排球員上場係v92既工作,照道理朗尼根本不能拒絕,所以並非只有朗尼既錯,v9w先係最大既問題所在!

  • Owen Lee
    Owen Lee 於 02/11/2015 評論 NO. 6

    唔好話棄用朗尼,就當係比佢抖下啦。。。

  • Donald Choi
    Donald Choi 於 02/11/2015 評論 NO. 7

    唔放朗尼穩奪英超啦...仲洗諗?

  • WingWai Chan
    WingWai Chan 於 03/11/2015 評論 NO. 8

    正路應該打4411
    廸基亞
    達美安 菲爾鍾斯 史摩寧 洛祖
    華倫西亞 舒拉達連 小豬 楊格
    馬達
    馬斯亞
    後備:羅美路、白連達、卡域克、靴里拉、爆炸頭、廸比、朗尼。
    但如果一定要朗尼正選,可以考慮與馬斯亞換位,或者541朗尼踢自由人,即是3名中堅的1員,自由中衛。

  • 牙滔
    牙滔 於 03/11/2015 評論 NO. 9

    大前提唔係陣式係踢法
    如果再係成班攬住個波9猜唔進取啲 比夠你3箭頭都係無用

快捷鍵:←
快捷鍵:→