[K11出品] 曼聯K角度 – 雲高爾亂棍打死屈福特

我地page 有大量轉會消息,精華,賽後分析/評分, 記得要時刻留意我地 Facebook!
https://www.facebook.com/RoyceMU/
仲會有個人精華,曼聯點將錄,全場錄影,曼聯家書,賽後訪問等,你仲唔快d like?

一望完個出場陣容, 嘩, 雲高爾真係奇人奇事是神奇技倆, 科素文沙出任中堅, 一名年青球員, 擅踢中場位置, 首次正選改任中堅, 而拍擋是一直不被看好於中堅的白蘭特, 即使對手是中游及近況不穩既屈福特, 即使密集賽程, 是否有咁既需要? 而馬達已經是正選全隊年紀最大的球員, 真的年青就可以嗎? 結果平安鐘被禁爆, 賽事也不沉悶, 但足球就是這樣, 曼聯就於賽事末段由今場”老將”馬達射入奠勝罰球1比0勝出, 雲高爾呢招可謂亂棍打死屈福特, 有幾亂? 我K11同大家一齊黎睇下啦!


出場陣容, 龍門迪基亞, 後衛由右至左分別為華利拿, 科素文沙, 白蘭特, 盧祖, 中場為舒拉達連及靴里拉, 進攻4子分別為馬素爾, 馬達, 迪比及單箭頭既拉舒福特, 馬素爾雖然復任正選, 但雲高爾始終執迷不悟, 仍要放於右邊, 老人家真係牛頸………………..


迪基亞今場波其實救出很多很多波, 但又不算神救, 為什麼? 因為其實對手既射門並不刁鑽, 但數量卻很多, 恩哈路最少3次射門被迪基亞救出, 而恩哈路自己也射斜了2-3次射門出界, 否則呢場肯定是一場大手交易既賽事, 白蘭特, 真係要多謝迪基亞……………….


右後防方面, 華利拿繼續穩坐正選位置, 此名年青球員的確是攻強於守, 今場波防守上沒有大錯, 但於後防取得皮球後, 有時會賣弄一下腳法, 從閘位球員來說, 只要適量, 是沒有問題的, 是帶有可觀性, 而且其助攻既時間與位置慢慢掌握得到, 可留意到此子既潛力慢慢出來, 不過我K11苦口婆心的要提提, 華利拿真的要改善多點防力上的問題, 這樣才能穩坐曼聯正選之列, 始終防守是最重要的, 看看華倫西亞當初由右翼轉往右閘時的位置感與防守意識, 真的嚇死人, 但一但改善, 他卻是一名難以被衝破的閘位球員, 有潛力的華利拿, 繼續努力!!

左閘為盧祖, 上場其實踢不足全場已因微傷退下火線, 估不到今場繼續正選, 雲高爾真的要保護一下盧祖呢, 於左閘位置既佢, 表現穩定, 但狀態上還可以再提昇, 70分鐘由達米安入替。同樣傷癒復出的新一代通天老倌, 今場入替盧祖於左閘出現, 繼續其穩陣演出, 一次包回中路既解圍實屬精彩, 其餘時間則安全為上。


中堅方面, 先說科素文沙, 開波初段, 我K11很擔心會出事, 看到此名中場球員幾次落腳兇狠, 更於22分鐘領黃, 擔心今仗會否出現紅牌收場呢? 結果雲高爾委任此子既決定不但亂棍打死屈福特, 更打了我K11一巴, 取領黃外, 我K11對科素文沙其後既表現由攔截兇狠, 慢慢變成快, 狠, 準, 雖然也曾有被恩哈路扭過既情況, 但回身快, 也不致身位全失, 其實更多次幫拍擋白蘭特包回已失之位, 而原來科素文沙於下半場曾想換出, 但被雲高爾拒絕, 結果也沒有令人失望, 為曼聯守足全場。不過希望雲高爾能了解一下為何此子想換出的心態, 雖然幼齒可調教, 嚴厲或可迫出潛力來, 但都要有關懷之心。

另一中堅白蘭特, 今仗成為球隊既超過炸彈, 11分鐘其實已走漏恩哈路, 而17分鐘更於無壓力下, 直接交給了恩哈路去攻門, 幸好迪基亞接實射門, 繼續是37分鐘又被恩哈路爆過, 今次幸得科素文沙力追下令其收窄射門角度再加上迪基亞救出。未完………42分鐘, 恩哈路乘白蘭特不為意偷去其腳下球後射門又是迪基亞。上半場講完, 下半場又黎, 46分鐘, 白蘭特又傳失, 幸好多名曼聯球員即時包位令屈福特未能射門, 相信恩哈路都不能相信白蘭特給他這麼多次的機會, 而更不相信是自己也未能把握, 講笑一下, 可能因此信心盡失, 73分鐘被換走, 白蘭特之心理戰成功……………….認真模式重啟! 此仗明顯見到白蘭特不能成為一夫當關既後防球員, 之前有拍擋史摩寧, 有卡域克等有實力既中堅或有經驗既替工, 令白蘭特表現未致哪麼失準, 但今仗可能自己變成中堅組合中的老大哥, 卻踢得比新秀還要差, 似乎白蘭特的心理質素真的未能成大器, 反而迫出中堅大佬史摩寧, 合適替工卡域克與及今仗臨危受命既科素文沙來。


防中位置方面, 我K11知道上篇文章對舒拉達連既表現未如理想引起一點反對之聲, 不過如果大家今場波有睇足而作對比, 唔知會唔會發現今場波舒拉達連既表現比上仗真的明顯出色呢? 由舒拉達連入魔後, 我對其一直有相當高既期望, 如果是我K11的忠實讀者, 應該知道我K11對目前陣容的理想排陣, 舒拉達連是防中必然正選, 因為對其要求極高, 大家有否記得馬基利尼? 防中的重責是做中堅前面第一道防線, 一旦越過, 中堅便要面對很大壓力, 因為後面便是門將, 所以中堅能做到包位時間, 位置準確, 對後防有很大幫助, 今仗舒拉達連似乎比上仗更習慣中堅組合的不穩 ( 主要因為白蘭特……… ), 今仗出現既位置, 時間都非常好, 而且更不見有急燥既表現, 所以我K11對今仗舒拉達連既演出其實比上仗更滿意。18分鐘多送一次史高斯式禁區邊窩利射門給大家, 雖然出界……………..


另一中場靴里拉, 除41分鐘半傳半射既一球較有亮點, 其實今仗表現對於佢個人黎講, 只屬一般, 雖然有3次的關鍵傳球, 但是我K11感覺到靴里拉對於今仗既節奏明顯未能捉摸, 但其實他的位置卻是一個要控制節奏快慢既位置, 由於2隊既節奏都很急, 令靴里拉也跟著的急, 雲高爾於77分鐘將其換走也是適當的換人。不過換入靴里拉的是連加特, 起初以為球隊會由4-2-3-1轉為4-4-2, 菱形中場, 結果踢來卻發現只是位換位, 連加特於中場中靴里拉的位置奔跑, 明顯連加特不習慣, 有1-2次我K11看到連加特不其然走到邊路與當時控球既球員有重疊既情況卻不是做合作…………


進攻4子………….雖然迪比近況有回勇跡象, 但雲高爾安排馬素爾復出便於右路出現………..同自廢一臂有何分別? 結果右路既馬素爾今仗明顯不在狀態, 8分鐘便浪費了一個頭鎚既機會, 27分鐘既篤射毫無力水, 球感明顯不足, 雲高爾結果於60分鐘將其與拉舒福特換位後, 其實表現繼續沉寂, 但卻換來多一個調動, 就是拉舒福特踢右翼, 馬素爾踢正前, 效果反而更佳 ( 前提是迪比繼續獨霸左路 )。



左路既迪比, 今場波比對上3仗既表現就相對失色, 由於信心繼續爆棚, 今仗回復了一點交波時間不恰當, 令隊友難以配合, 或者是以自己之力硬爆但失敗及效果其差, 例如15分鐘既左路切入射門, 大撻成界外球, 其後更不下一次遲遲不與隊友做配合或者太心急斬中, 力度又太大出界等等………….看來傑斯返去要再禁室培育一下迪比了, 不過賽事尾段於領先後既角球旗戰術卻成為亮點, 迪比既身型的確強壯, 希望迪比真的能成材……………….


連續多場出任正選既馬達繼續於其擅長既10號進攻中場位置出現, 今仗其實其表現也有著與靴里拉一樣, 不習慣節奏的情況, 可能今場英式節奏既賽事, 並不是西班牙球員的風格吧, 下半場明顯有改善, 於60分鐘出現一次有威脅既遠射但被高美斯救出及後再想補射但被侵犯搏得罰球, 65分鐘再接應靴里拉既傳中射門不過斜出, 但最重要既射門於82分鐘出現, 馬達既罰球直射入網, 高美斯飛盡都未能觸球, 就這樣, 今場身為隊長既馬達帶領曼聯取得各項賽事4連勝, 89分鐘由麥尼亞入替。麥尼亞只做防守幾分鐘便完場了。


正箭頭既拉舒福特今仗雖然未再建功, 但表現絕不失禮, 其敢於突破既勇氣及速度, 為屈福特後防帶來一定既麻煩, 雖然今仗未有一次射門但於60分鐘與馬素爾換位後, 卻表現其可勝任翼鋒之才能, 令曼聯可調動既陣容多一個選擇。


有即討區讀者想不通為何連加特入替時不換走迪比讓馬素爾重點左路而是換走靴里拉, 一來靴里拉似是節奏未能跟上, 二來馬素爾其實明顯狀態未夠, 但當時又未領先, 萬一失波便沒有再可換入鋒線既籌碼, 所以不敢換走任何一名進攻球員, 雖然由連加特於中場中位置, 我K11也想不通, 可能參考雲加的張伯倫吧?! 而迪比另一用處是突擊, 雖然今仗有點故態復萌, 但迪比拿著球, 只要不胡亂做決定, 對手也不易搶到其腳下球, 相反馬素爾卻有點兒未入局既感覺, 唯有將其與拉舒福特換位一試效果。其實馬素爾也有一球於左路出現及嘗試以其看家本領爆落底線, 不過對手一食身位, 皮球慢流出界成球門球, 如果當要換入連加特的時候, 曼聯是已經領先一球, 我K11相信雲高爾換走既也不是迪比, 而是馬素爾。


今場波, 雲高爾用來一記胡亂既章法, 與屈福特一拼, 說實話, 整場波既形勢, 一定是屈福特佔優, 只是恩哈路最近既把握力極差而且入球太集中於佢及甸尼既情況下, 當然加上奇兵科素文沙及迪基亞既穩定演出才能守住大門, 而且舒拉達連今仗成功令屈福特既後上力大減, 曼聯後防最為擔心既其實只是恩哈路及…………..白蘭特! 而且今場波2隊似上演一場英式節奏既護級大戰, 2隊上上落落, 快打快, 亂鬥亂, 為求搏得領先既一球為止, 而最後曼聯靠年青球員既鬥志, 靠有質素球員的罰球技能取勝。領先後既曼聯, 由於已經超過80分鐘, 球員也冷靜下來, 沒有繼續心急鬥快, 直到完場取勝。


如果讀者問我K11對今場曼聯既表現如何? 我K11肯定的答, 場波唔悶, 因為飽食驚風散, 但只有個別球員表現合格, 幸好靠有質素既罰球奠勝而已, 希望周日作客西布朗, 曼聯能踢回自己正常應有既風格, 雲高爾不要再用亂棍出招, 嚇得一眾曼迷心驚膽跳吧。


值得一提, 由於頭4隊球隊相繼失分, 曼聯現時與榜首既李斯特城只有10分差距, 與第四既曼城已經同分不過踢多1場及得失球不夠曼城, 今季英超真的很激烈, 再次感謝各位支持文宇直播即討區既朋友, 下場見。


我地page 有大量轉會消息,精華,賽後分析/評分, 記得要時刻留意我地 Facebook!
https://www.facebook.com/RoyceMU/
仲會有個人精華,曼聯點將錄,全場錄影,曼聯家書,賽後訪問等,你仲唔快d like?

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Kin12
    Kin12 於 03/03/2016 評論 NO. 1

    白連特表現太差喇 全靠迪基亞至能力保不失 今場袋三分運氣佔多

  • Chun Yu
    Chun Yu 於 04/03/2016 評論 NO. 2

    繼續亂棍

  • L Lo Pang
    L Lo Pang 於 04/03/2016 評論 NO. 3

    跟本錯晒,白蘭特跟本就係防中質素。有腳法冇身位跟本取其短處。咁不如費蘭尼打中堅。技術上會改白蘭特易好多

  • Leslie Lai
    Leslie Lai 於 04/03/2016 評論 NO. 4

    我知唔係咁應該話編者,但編文真係唔少錯字...

  • Vic Chan
    Vic Chan 於 04/03/2016 評論 NO. 5

    白連特作為係用黎反襯隊友嘅勁,上季有卡域克受惠,今季到史摩寧成材,下季比佢打前鋒或者朗尼可以翻生?

  • rickytct
    rickytct 於 04/03/2016 評論 NO. 6

    有mcnair都唔明點解要出白蘭特

  • rickytct
    rickytct 於 04/03/2016 評論 NO. 7

    你估隊隊都係阿仙奴咩,連白蘭特+卡域克既中堅組合都突破唔到

  • 陳日雄
    陳日雄 於 04/03/2016 評論 NO. 8

    朗尼賣去中国算啦,人工又貴,年紀又大😁

  • Chan KamSan
    Chan KamSan 於 04/03/2016 評論 NO. 9

    點亂棍呢!點睇係係-6喎!😞

  • Henry Chee
    Henry Chee 於 04/03/2016 評論 NO. 10

    如果冇朗尼,就又佢繼續亂吧!最好朗尼以後都唔好返嚟😉

  • Tony Chiang
    Tony Chiang 於 04/03/2016 評論 NO. 11

    屈福特踢得唔錯

  • Teddy Chan
    Teddy Chan 於 04/03/2016 評論 NO. 12

    一開始射罰球未得囉,洗踢90分鐘咁耐

  • 鄺文輝
    鄺文輝 於 04/03/2016 評論 NO. 13

    ,曼記咁既表現!踼多十塲我都買對手完勝啦!V92自我感覺良好。

  • Taco Lee
    Taco Lee 於 04/03/2016 評論 NO. 14

    屈福特痛失三分

  • Edton Li
    Edton Li 於 04/03/2016 評論 NO. 15

    一個字講哂:好運

  • Jason Wong
    Jason Wong 於 05/03/2016 評論 NO. 16

    肥仔應該係話得中超做水魚之外 都冇乜人肯接手

快捷鍵:←
快捷鍵:→