又係我K11, 相信好多曼聯球迷, 都帶著緊張又憂心既心情去迎接呢場歐冠盃分組賽第四場主場迎戰莫斯科中央陸軍既賽事, 緊張就唔洗問架啦, 憂心就緊係擔憂曼聯今場可以打破近4場既入球荒, 歐冠盃小組可唔可以重奪榜首之位, 朗尼入唔入到波, 點解用擔憂, 因為其實大家對種種既希望, 不帶太大既期望……..擔心空歡喜一場, 但一場及時雨既勝仗, 解決以上擔憂, 我地一齊黎睇下呢場波有幾及時吧!
首先想讚讚雲哥爾, 細心既球迷, 可以留意一下今場曼聯既戰術, 2隊2周前已經交手一次, 大約知道對手攻力, 相信雲帥預計今場對手知道曼聯主場會主攻, 加上近期曼聯多出現久攻不入既情況, 客軍以防反為主要戰術, 實在係理所當然, 正因如此, 雲哥爾呢場屯重兵於中路最直接破解對手反擊 ( 以下會詳細講解 ), 2閘以楊格及盧祖進行翼衛助攻, 就係睇中對手缺乏快速翼鋒, 而今仗以連加特為正選, 此子今仗不負眾望, 表演優異, 成為奇兵。
龍門繼續由迪基亞把關, 繼續予人穩陣既感覺, 今仗客軍攻門不多, 但其中一球, 突破後防既直線形成單刀, ( 呢球要鬧白蘭特, 無跟人, 中路防守既意識始終較弱 ), 但迪基亞面對單刀再次救出對手第一腳射門, 及後由史摩寧加楊格雙人護空門救出, 其他時間迪基亞可以食下花生。
後防方面, 上文提過, 今仗以楊格為右閘代替受傷既華倫西亞及不擅助攻/傳中既達米安, 加上估計為戰術要求, 盧祖今仗同樣加強助攻, 結果今場2閘傳中次數眾多, 不時產生危險既機會, 盧祖更有一次禁區內無人看管下窩利射門可惜未能命中, 而中路防守, 史摩寧慢慢顯出其大將之風, 除有一次護空門外, 補位/攔截等數據都反央出黎, 白蘭特方面, 除左一球要鬧之外, 其後場長傳既功夫繼續, 其中一球傳交馬達入攝可惜差一點點成事。
中場方面, K11哥哥, 你之前話過小豬及卡域克盡量唔好同場, 但呢場雙雙正選喎, 點算先? 首先要留意既, 舒拉達連因私人理由缺席周一既操練, 雲帥已接納其操練既缺席, 順理成章, 今仗不獲正選及後備, 結果雲帥選用小豬及卡域克而棄用費蘭尼, 雖然小豬上場踢足69分鐘才被換出, 其踢法以經驗於中場掃蕩, 其實正好適合今場賽事, 理由跟上場對水晶宮賽事一樣, 希望以其經驗及中場覆蓋度將客軍反擊時既直線截斷, 而由於對手攻力不算十分厲害, 節奏都不及其他英超既球隊, 卡域克今場正好適合其發揮能造出有直接威脅既傳送, 唯一既入球就係由卡域克由後場傳出高空球予連加特再傳中, 由朗尼射入, 而針對呢場賽事, 雲帥似乎都滿意呢個中場排陣, 2者各人既傳球成功率達88-89%之多, 費蘭尼及後入替既係馬達, 而卡域克踢足全場及小豬接近全場, 但要留意既係, 由於小豬既踢法, 其體力既消耗會成關鍵, 如果一周三賽 ( 假設黎緊周末再正選對西布朗 )可能令其水準有一定折扣, 可以考慮周六讓其休息或賽事尾段先上陣, 舒拉達連今季於曼聯中場中既重要性很大, 今場陰差陽錯下, 正好讓其休息一場, 希望周六可以重點正選名單, 另一人選可考慮由卡域克或費蘭尼出任, 前一格既進攻3中場, 今仗繼續由馬素爾出任左邊, 馬達為進攻中場中路, 右邊由新人連加特出戰, 先講講馬素爾, 今仗表現平平, 如果有睇我上篇水晶宮既文章, 已提及馬素爾經過精彩既10月份之後, 開始有少許疲態, 今仗更覺明顯, 似乎要讓其休息一下, 儲力再爆, 可以考慮下場只踢半場或先作後備輪換, 而進攻中場方面, 此位置其實可以由馬達及靴里拉出任 ( 差點想寫埋朗尼 ), 結果雲帥今仗選擇讓靴里拉休息, 由馬達正選, 於比賽下半場中段換出, 今仗表現正常, 但不帶耀眼光芒, 因為今場耀眼光芒被新人連加特搶過正著, 此子於之前既文章已提及帶俾曼聯一種新鮮既感覺, 可以衝擊現時沉寂既曼聯進攻, 佢唔算係技術型或突破型, 但其踢法簡單, 直接, 好洗好用, 最重要係年青人有一定信心及其衝勁, 只係缺乏經驗, 今仗除左助攻既一球傳交漂亮, 其後仲有一球接應朗尼既窩利及半單刀可惜都未能把握, 希望此子繼續有更多既時間上場, 但留意一點, 此類球員既特性係簡單, 直接, 效率型, 所以一旦水準有點下降, 便即時隱形, 所以此子自己都要保持水準, 每次出場都要帶黎一定既曝光率維持其狀態, 今仗以後備身份入替既迪比, 暫時見今仗減少左”唯我獨尊”既感覺, 希望可以重新上路吧。
正前鋒繼續用隊長朗尼, 今仗朗尼雖然射入一球關鍵入球, 但老實不客氣, 入波前既佢, 其”前鋒”表現繼續不合格, 由於小弟都係司職前鋒, 深明其表現仍然未見為前鋒, 其中一球於禁區內控定, 對手雖然有明顯拉衫, 但朗尼慢左一個beat先跌低, 球証唔俾牌已經偷笑了, 如果係一名稱職既前鋒, 以呢球黎講, 應該點都盡其能力先射門, 球証吹罰與否, 留俾球証諗啦, 但不得不提既係, 其實朗尼不下一次作出致命傳送突破對手防線, 可惜2次連加特都未能把握, 但……….此為進攻中場既任務吧? 我唔係雞蛋內挑骨頭, 而係, 曼聯現時的確係缺少一名搶錢般, 充滿射門慾 ( 希望唔好令讀者諗起迪比既浪射喎! ) 既入球機器, 恨鐵不成鋼也, 當然接應連加特頂入既一球非常流暢及精彩, 及後朗尼都好似執番少少信心, 動作爽左好多, 但呢個只係一個重新振作既起步點, 希望朗尼可以重回正軌, 隊長呀, 我要你表現出既係前鋒既”火”。
睇到呢度, 大家一定以為我所指既及時雨只係連加特? 深層一點地, 及時雨其實係一場主場迎戰莫斯科中央陸軍既歐冠盃勝仗, 今仗不同聯賽盃作客米堡既賽事性質, 此關乎歐冠盃出線既賽事重要性十足, 球隊唔會以輕鬆/輕敵既態度面對, 對手唔同其他節奏快既英超球隊, 令現時沉重既朗尼得以尋回自己, 令小豬加卡域克同場既缺點不以曝露, 令舒拉達連得以順理成章地休息, 對手估計會以防反戰術, 令曾被稱為戰術大師既雲帥得以發揮其戰術調動, 造就出連加特及時既表現, 朗尼及時既入球, 球隊及時既勝仗, 令曼聯及朗尼既信心得以回覆不少, 迎戰國際賽期前既一周英超聯賽, 信心係一切勝利既來源及動力!
比賽日我地會po 直播 link 比大家睇波， 記得留意我地既page!
https://www.facebook.com/RoyceMU
仲會有賽後評分，精華，個人精華等，仲唔快d like?
請按此登錄後留言。未成為會員? 立即註冊