[K11出品] 曼聯K角度-和波後的批判

比賽日我地會po 直播 link 比大家齊齊睇波, 記得要時刻留意我地既page!
https://www.facebook.com/RoyceMU/
仲會有賽後分析/評分,精華,個人精華,曼聯點將錄等,你仲唔快d like?

又0比0, 第幾次? 講!! 今季第五次喇!! 幾多場係主場? 講!! 第四場喇!! 呢隊到底係咪曼聯? 雲高爾到底識唔識進攻? 係咪曼迷們既心聲? 乘著較早時間既曼城失分, 如果能夠贏波而回, 便可再次領先曼城, 主場面對近況低沉加有主將受傷既韋斯咸都唔能夠全取3分, 大家一一既疑問, 等我K11黎同大家一齊批判一下!


由於周中有一場歐聯生死戰, 老實講, 相對呢場主場賽事, 其實周中既賽事更加重要, 因此, 雲高爾今仗既正選陣容及排陣都相對保守, 龍門毫無疑問的繼續是迪基亞, 但後防由左至右分別為麥尼亞, 史摩寧, 白蘭特, 達米安, 中場方面, 舒拉達連與小豬為防中, 進攻方面為連加特, 費蘭尼, 馬達, 前鋒為今日生日既馬素爾, 由於朗尼, 靴里拉, 盧祖及鐘斯仍然有傷, 雲高爾對於周中既歐聯戰, 最主要收起楊格, 迪比與卡域克為常規球員。


今場龍門既迪基亞, 於11分鐘便再次顯示身價, 直接救出韋斯咸既單刀波, 但20分鐘卻見到少有既失誤, 接應傳中球竟然彈琵琶彈出, 史摩寧解圍省中薩耶迪再中柱, 球迷奇遇記上演, 及後22分鐘再出現角球, 韋斯咸再次中柱彈出, 之後既時間, 一係韋斯咸攻門唔中龍, 一係迪基亞只需要作基本既出迎, 再需要表演既機會不多。


後防方面, 曼聯今季主場防守有一定既保證, 14場聯賽只失一球, 而雲高爾始終鐘情白蘭特與史摩寧既合作, 即使達米安與麥尼亞都可以勝任中堅位置, 仍然搶不走白蘭特既位置, 但實際上今場既防守未算合格, 防11分鐘白蘭特一次大意失控球造就韋斯咸既單刀與迪基亞既表演, 而於較後時間, 全靠奧脫福之門柱於20及22分鐘救回2命, 幸保半場不失, 到55分鐘, 再一次被韋斯咸打入去小禁區K角位, 幸好射斜而出, 其實整條後防線個別球員都算合格, 但整體而言卻是欠缺集中, 今仗隊長既史摩寧繼續有後防老大哥既風範基本上無失位之外, 助攻更有次射門差點成功, 可惜射中對方後防球員無功而回, 而半場時, 雲高爾即時換走麥尼亞, 再次換入曼聯新丁, 屬於烏拉圭既30號右閘華利拿, 此子出場後看到其表現不俗, 尚算冷靜, 不過始終經驗不夠, 於賽事尾段, 接近角球旗位置既地方犯規, 其實較弱一方是十分歡迎對手後防球員於賽事尾段犯規, 因為有一次比角球更好既機會一搏, 如果成功, 無仇報也, 幸好始終今場賽事既韋斯咸出波未如理想, 完全用唔到巨人卡路爾既空中優勢。



中場方面, 雲高爾繼續排出雙人防中, 我K11不意外也不覺得有何不妥, 但舒拉達連伙拍小豬我卻有點微言, 因為小豬已經多場正選, 體力問題真係有點擔心, 加上周中仲有一場非勝不可既作客歐聯賽事, 不過擔心還擔心, 事實歸事實, 只期望小豬不會有明顯狀態下滑或受傷既情況出現, 結果小豬都要踢至73分鐘先可以再休息, 雲帥, 唔好用得小豬太盡呀, 不過不幸既事, 卻是發生於舒拉達連身上, 剛復任正選既佢於43分鐘便疑似拉傷被迫換人, 此情況為曼聯一大壞消息, 幸好換出時見可能只屬輕微拉傷, 希望雲高爾只為安全起見, 主動收起而非被迫換人, 有待賽後傷患報告證實了。而後備換入既卡域克, 其實佢正是從韋斯咸成名, 及後轉會到熱剌更上一層樓再到曼聯既倒戈將, 從不懷疑佢既實力, 而下半場有佢出現, 穿越球就更覺有威脅, 照計呢場波佢所需要既體力不多, 應該可以應付周中既歐聯賽事。


前一格既進攻線由左至右分別為連加特, 費蘭尼, 馬達, 今仗連加特傷癒復出, 表現繼續搶鏡, 佢哪股不知天高地厚既帶球直闖什具威脅, 而且於適當時候起腳射門都相當重要, 除左上半場38分鐘, 當韋斯咸門將阿祖安出迎後成空門狀態下, 連加特卻想推過後衛而非即時試射令我有點失望外, 其餘時間其表現都合格, 而馬達, 狀態比上一仗好, 今仗曼聯既小組組織次數增加, 變相馬達踢法既應用增加, 所以將其表現及狀態得以提昇, 可惜65分鐘時, 曼聯一次小組滲透由馬素爾傳交馬達施射不過馬達既生虫腳射斜, 希望其狀態繼續回昇, 好耐未入波喇!!!!而費蘭尼, 今仗雲帥終於讓其正選上陣於進攻前上, 位置卻是代替因傷缺陣既朗尼/靴累拉既10號位置, 起初有點意外, 但踢落發現其實此舉目的為發揮其高空二傳既優勢, 卻有數次威脅產生包括15分鐘二傳馬素爾攻門及59分鐘既接應馬素爾既小禁區近射(雖被門將救出), 其後因換走小豬, 便退居中場做防守中場, 按今仗韋斯咸既攻力, 沒有問題, 今仗費蘭尼可以為自己踢番場爭氣波。後傭入替既迪比, 今仗表現繼續復甦, 漸漸擺脫黑洞之名, 更於79分鐘有一次爆落底線傳中馬素爾可惜射斜, 希望迪比可以慢慢適應英超既節奏, 踢出其身價應有之能力。


前鋒線由馬素爾擔正, 今仗其表現都繼續搶鏡, 最少2次有威脅射門, 可惜1次被後防球員近門擋出, 一次接應迪比傳中射斜(只一個波位左右), 其冷靜表情與禁區內冷靜動作的確令人難以相信其20歲既年紀, 可惜今仗似乎幸運之神未帶給他任何生日禮物, 但其狀態似乎已經回復到剛剛來到曼聯之時既水準, 對此, 我K11充滿了期待!

講左咁耐, 何來批判? 我地先黎睇睇今仗曼聯既數據, 6成控球, 半場5射1中門全場14射2中門, 似乎明顯將要批評既說話帶出, 把握力與中框率, 雖然上述球員表現看來個別都不算差, 而且感覺正面, 但偏偏卻是0比0, 全因中框比率只有不足20%, 如果以一隊英甲或英冠球隊, 好正常既數據, 但一隊英超前列球隊, 什至只係英超球隊, 此數據絕對要狠狠批評, 請曼聯既數據團隊好好掌握及針對性作出射門訓練, 但從戰術上, 理性地, 客觀地, 雲高爾今仗既排陣與戰術, 從中前場黎講, 我見到既係多次既小組組織而且能打進對方禁區, 比之前只完全追求控球而不作冒險傳球既情況有明顯改善, 射門次數都不少, 如果今仗由朗尼或靴里拉處理費蘭尼59分鐘既近射, 可能已經穿網再慶祝, 但費蘭尼今仗多次二傳成功, 或於前場定球再做駁腳, 加上有意慾地射門, 卻是我K11一直想說10號位置或9號半位置要做既工作, 為何費蘭尼能處理得宜? 為何今場波曼聯小組組織次數增加? 到底係雲高爾對球員既戰術要求有所改變, 還是朗尼本身既問題? 我K11當然希望為前者, 因為如果朗尼可以做到今仗費蘭尼所做到既工作 ( 轉為防中前 ), 朗尼既威脅絕對比費蘭尼大, 而靴里拉也絕對勝任此踢法, 唔知係咪靴里拉密會雲高爾對其進攻戰術作出既要求呢?


又黎題外話, 又提下我K11之前所寫既<<尋找快翼的雲高爾 – 是你嗎?>>一文既讀者, 馬列斯, 係呀, 又係馬生呀 ( 唔洗提我佢唔係姓馬 ), 本周大演帽子戲法, 帶領李斯特城重返榜首, 郁手未呀, 雲高爾?



比賽日我地會po 直播 link 比大家齊齊睇波, 記得要時刻留意我地既page!
https://www.facebook.com/RoyceMU/
仲會有賽後分析/評分,精華,個人精華,曼聯點將錄等,你仲唔快d like?

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • shawwong
    shawwong 於 07/12/2015 評論 NO. 1

    總係差少少, 不過唔輸已經好彩喇

  • Lala Cheung
    Lala Cheung 於 07/12/2015 評論 NO. 2

    總好過輸波嘅

  • Fred Lam
    Fred Lam 於 07/12/2015 評論 NO. 3

    其實佢係咪想完整執好條防線,之後先執進攻?

  • Ken Liu
    Ken Liu 於 07/12/2015 評論 NO. 4

    要不是韋咸單刀唔入同中左兩球柱…👤👤👤

  • Kenny Wong
    Kenny Wong 於 07/12/2015 評論 NO. 5

    鎚仔今仗又踢得好番好多

  • 工藤新一
    工藤新一 於 07/12/2015 評論 NO. 6

    雲高爾真係太過保守,淨係識控球在腳,冇比對方有太多進攻機會,失球自然少,但如果進攻做得好少少既話有好多場和波都變贏波😕

  • Tim Tam
    Tim Tam 於 07/12/2015 評論 NO. 7

    其實大家會唔會忽略左韋斯咸今年對強隊既表現呢?比歷場場都做足針對既部署,之前作客贏阿仙奴,利物蒲,曼城,唔係符碌架
    雲高爾係有問題,但呢場波眼見進攻既節奏明顯比肥仔在場快左,做到既機會多左算是值得欣賞既一部分
    唔好再比較過去,因為過去除左有一個神級領隊外,都有一招守唔住既突破點,家陣係無呢類人,借走左既唔係,天使曾經幻想過,可惜都唔太適合英超節奏,期望廸比生性,贊奴沙再大進步好過

  • Jason Sy
    Jason Sy 於 07/12/2015 評論 NO. 8

    你要知道季初West Ham有Payet

  • ak58
    ak58 於 07/12/2015 評論 NO. 9

    費蘭尼, 踢落發現其實此舉目的為發揮其高空二傳既優勢
    費蘭尼識2傳? 費蘭尼剩係識係冇人迫之下頂入龍門,佢既頂上功夫真係麻麻,何來2傳既優勢?

  • 謝灌剛
    謝灌剛 於 07/12/2015 評論 NO. 10

    為咗keep住控權,好多時傳波都比到腳邊唔係比位,咁點特破防線?

  • Kenneth Yuen
    Kenneth Yuen 於 07/12/2015 評論 NO. 11

    點都好過車仔又輸多塲 😓

  • Wai Ko
    Wai Ko 於 08/12/2015 評論 NO. 12

    從好嗰方面諗,車仔打護級,李斯特係榜首。。。證明英超係惡打左,0比0多都好過場場打護級丫。。。唔講呢啲阿Q嘢真係唔知點好

  • Mavic Lo
    Mavic Lo 於 08/12/2015 評論 NO. 13

    ZzZzzzzZ...ZzzzzzZz

  • Gio Gio
    Gio Gio 於 08/12/2015 評論 NO. 14

    今場曼聯好好運先保住1分。。。

  • Wayne Chow
    Wayne Chow 於 08/12/2015 評論 NO. 15

    全靠韋斯咸球員怕入波,曼聯力保一分

  • Stefan Laren
    Stefan Laren 於 08/12/2015 評論 NO. 16

    打和一隊氣勢和走勢凌厲的球隊真的這麼十惡不赦咩?

  • 塔奇克馬
    塔奇克馬 於 08/12/2015 評論 NO. 17

    冇一個有入球觸覺...

快捷鍵:←
快捷鍵:→