[讀者投稿] - 一個曼迷(縮返入狗窿之前)的感想

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


應該從何說起呢?麥佳亞災難級嘅表現?球證嘅誤判扼殺咗場波?球隊補強依然未夠?定抑或問下究竟後費格遜年代嘅曼聯發生咩事?或者我問錯咗問題。應該問從誰說起呢?係蘇B執教經驗不足導致球隊表現不穩?還是歸根究底係活禾特 (Ed Woodward )管理不善嘅問題。
以下純粹個人意見,不喜隨便插。我認為係後者嘅責任。近一兩年曼聯嘅轉會往往比我嘅感覺係拖泥帶水。每次無限接近曼聯嘅球員,先唔講佢最後有無真係轉會曼聯,轉會消息多數都係話兩間球會喺轉會費上面周旋或糾纏,遲遲未能獲得共識。我深信就球員嘅報價,蘇B係無權利亦都無責任去處理。反而就住球隊需要喺邊個位置上作出補強,從而向球會管理層反映出球隊最需要買嘅球員,蘇B係責無旁貸嘅。但球隊買唔到領隊想買到嘅球員去提升球隊嘅表現,就依個問題上面,係邊個嘅責任我留返俾你地諗。

補充番有無真係轉會曼聯嘅球員例子。成功轉會嘅譬如有麥佳亞同般奴。大家唔好唔記得,當初麥佳亞嘅轉會都係因為就轉會費問題遲遲未能解決,最尾麥佳亞罷踢,曼聯用咗8,000萬買佢。值唔值你地自己諗。般奴都係傳咗一個夏季之後,冬季轉會窗先買到。依啲唔係管理層問題咁係邊個嘅問題?無限接近嘅有列基朗,辛祖。前者因為曼聯出唔到理想轉會費而最後俾熱刺中途截劫咗;而後者就因曼聯未能滿足多蒙特1.2億嘅索價導致辛祖加盟球隊落空。你可以話以上嘅嘢好大程度上係傳聞,未必係真。但係只要我帶著「空穴來風,未必無因」嘅頭盔,我就可以大大聲指住活禾特個鼻鬧,係你嘅錯!
我經常同一位曼聯好友討論蘇B IN定蘇B OUT嘅問題。我個人係SO B IN的。的而且確,蘇B比起其他領隊係遜色好多,佈陣及換人方面都有好多改進嘅空間。但我都睇到佢係有計劃去培育一支有實力嘅球隊。我睇到佢有嘗試用青訓融入球隊。但我睇唔到管理層有出力去配合佢嘅計劃。蘇B OUT嘅朋友就一直認為佢經驗唔夠,唔太識調動同埋點樣發揮球員嘅強項同質素。不過大家要諗下,換蘇B,咁邊個上任?大名鼎鼎嘅普捷天奴,沙利定係艾歷尼?邊個可以100%保證佢地可以令到曼聯有力爭標?前前後後換咗四個領隊,無一年有英超冠軍,後費格遜年代為球隊同年贏得聯賽盃同歐霸盃嘅摩佬逃不過被炒嘅命運。1,2年前佢離開曼聯曾經講當年為曼聯獲得英超亞軍是一件了不起的事,如今各為其主,佢帶領嘅熱刺喺奧脫福大炒舊東家6:1。曼聯係咪再換領隊就可以解決問題?

講番場波,麥佳亞需要休息。個人認為佢開季無場好波,好大機會因為受官司困擾而唔能夠集中比賽。除咗依個理由或者係藉口之外就無了。唯一解釋就係佢水平差,唔適合帶起曼聯嘅隊長臂章。球證執法水平同VAR嘅用處從開季至今一直受到批評,今場相信都唔例外。馬斯亞領紅牌之後兵敗如山倒,主場輸1:6,繼開League戰主場1:3不敵水晶宮後,低處未算低,輸多3球你嘆。
作為曼迷,今次真係得啖笑。唔係因為歐聯分組賽上上籤而笑,而係見到開季3場波已經搞成咁而苦笑。當然如果見到曼聯之後重整旗鼓,穩步上揚就最好。我都想做蕭生,但係咁樣落去,我相信唔止一場咁嘅波,可能會陸續有黎。恐怕今季我都係長期留返喺狗窿入面算。俾人恥笑都慣,係唔想睇到隊波俾人羞辱。

最後多謝你地睇到最後,如果有幸依篇嘢有人睇,希望多啲曼迷留言,我想睇下你哋點睇。謝謝

筆者: 艾夫拿


============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→