[月夜賽後短評] - 2023/24 英格蘭超級足球聯賽第三十二場 - 般利茅夫 VS 曼聯

Royce Sports 曼聯.費格遜 一站式為您提供所有關於曼聯嘅一切, 您諗到嘅都有！ 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

⏹️全場小分析
英格蘭超級足球聯賽第三十二場
般利茅夫 vs 曼聯
全場完，般利茅夫2:2曼聯
惡鬥完利物浦後，作客對陣般利茅夫，對手近五場只係輸俾盧頓，連番取得分數之下暫時排係第十三位，今仗面對般利茅夫嘅曼聯唔太樂觀，皆因後防線繼續出現中堅荒，中前場又無作出輪換調動，體能及傷患問題依然係曼聯近季尾嘅最大困擾。睇返出場陣容，曼聯後防線繼續依靠上場表現穩定嘅麥佳亞及甘比華拉鎮守，其他位置亦無改變。

上半場般利茅夫踢法進取，多次埋門機會之下殺曼聯一個措手不及，先係初段6分鐘於禁區內面對住三名曼聯球員推向右邊傳中，門前有麥佳亞成功封阻解圍，15分鐘奧拿拿大腳斬上前，賀隆心口一控交俾加拿祖但控甩，對手乘勢一腳直傳打反擊，甘比華拉被對手推過後轉身跌倒地上，對手於禁區頂一腳地波直射死角入網成0比1，其後福仔17分鐘左路自己帶波cup過對手窄角度起腳射中網側出界。面對住般利茅夫簡而有力嘅攻勢，幾腳波已經傳至禁區範圍，曼聯後防卻束手無策，20分鐘對手幾下盤扭cup過達洛治後斜射僅僅柱邊出界，27分鐘禁區外遠射又係僅僅楣頂高出。
幸好30分鐘憑住加拿祖右路底線傳至小禁區，般奴一腳勁抽破網追平比數至1比1。但尾段時間形勢依然落入般利茅夫腳下，先係32分鐘一腳斜射同樣柱邊出界，34分鐘以兩腳傳球直接製造威脅，對手K角位帶波推入禁區後一推再射近柱，奧拿拿都救唔到...比數再次被對手拉開成1比2，半場曼聯落後一球返入更衣室。

下半場迪亞奴入替加拿祖後，雙方節奏都開始減慢，直至62分鐘明諾嘗試起腳省中對手反彈至禁區內隊友嘅手臂，球證判罰十二碼，並由般奴主射地波入網兩度追平比數至2比2。隨後時間雙方都有作出輪換，曼聯方面換入曼治，而對手則連續換入三名後備球員補充活力，完場前對手殺入禁區時被甘比華拉擋下跌低，球證吹罰指甘比華拉侵犯對手，幸好經VAR後指為禁區外罰球，最終雙方打成平手各取一分完場。

============
RS一系列鎖匙扣已登場，除左有曼聯歷來最偉大領隊費Sir外，仲有伊巴同迪神添，想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有！ 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/