[多奇出品] - 點解朴智星喺曼聯取得咁好嘅成就?

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


無論隊友同球迷都認同朴智星喺曼聯取得嘅成就,但究竟係咩原因令佢咁成功呢?我哋可以從佢嘅個人踢法、比賽心態同隊友配合三方面去睇:

一、個人踢法。佢體能超強而且擅於跑動係每個人都知道,但只係咁樣又點可以喺英超立足同埋為曼聯攞到咁多冠軍。佢雖然係一個進攻球員,但佢嘅防守能力同樣出色,佢往往可以喺對方半場做逼搶,令到對方唔可以容易組織攻勢,破壞第一傳。有時候仲會有意想不到嘅效果。例如:2005-2006年聯賽作客對熱刺,當時熱刺守衛李榮杓控住個波,朴智星做逼搶,甚至偷埋佢個波,最終造成入球。佢嘅逼搶唔係單單跑去追人同追波,而係會封住對方傳波路線,等佢哋感受到壓力之餘,仲會覺得好難將個波傳出去,繼而開始猶豫唔知點做好,之後朴智星就會把握機會死纏對方,逼甩對方嘅腳下球。由於佢體力充沛,所以佢可以全場不斷去做,而唔係做完一段之後就冇氣,之後仲有氣力上前衝多一段助攻,最好嘅例子就係佢2007-2008年喺歐聯四強對巴塞兩個回合,佢走咗20,000米,而且仲要專門守住美斯,令到美斯威力大減,最後兩回合總比數贏1比0。另外,佢除咗防守貢獻之外,進攻亦都做得好稱職。佢嘅傳波同走位配合非常優秀,佢不斷嘅跑動,為隊友製造空位,打亂對方嘅防線。而佢嘅一控一傳或者係第一時間嘅傳送亦都做得精準,隊友可以好容易就接應到。佢亦都可以做頭搥二傳,雖然次數唔多,但佢係能夠做到,所以佢係2005-2006年球季就有8個助攻。喺入波能力方面,佢嘅數據雖然唔算特出,但每個入球價值都好大,唔係一啲錦上添花嘅入球。例如:2005-2006年聯賽主場對2比0贏阿仙奴入奠定勝局嘅第二球,2008-2009年歐聯四強作客對阿仙奴開紀錄嘅第一個入球,仲有2009-2010年主場對利物浦射入反勝2比1嗰球,都係令人印象深刻。


二、比賽心態。作為一位進攻球員,當然愈入得波多或者愈做得多助攻就最好啦,但朴智星明白到佢唔算係一個頂級球星,佢冇C朗高超嘅個人技術同入球能力、力量亦都冇沙夏同朗尼咁強,但佢有一個每一分每一秒都會盡力做好自己嘅心。佢唔計較去做一啲唔係咁搶眼嘅防守工作,亦都唔介意自己喺曼聯唔係第一主角,佢只係做好領隊要求所去做嘅工作。不過,佢做到自己份內事之餘,有時候當球隊陷入僵局,佢又會挺身而出,做一啲隊友同球迷期望以外嘅事。就好似領隊預期佢依場比賽表現攞6分,佢就攞足6分,叫佢攞7分,佢就會盡力攞足7分,有時甚至係超額完成,喺2010-2011年歐聯主場對車路士嘅入波。佢依種拼盡全力去做好每件份耐事,完完全全地感染到比賽中嘅隊友同睇波嘅球迷。仲有,佢嗰種無私同唔計較嘅精神亦都值得我哋去欣賞。例如:2008-2009年聯賽主場對紐卡素,佢奮不顧身將個波交俾貝碧托夫射入,2005-2006年聯賽對富咸單刀無私地橫傳俾雲佬射入。初時費sir由PSV燕豪芬買朴智星番嚟,好多人都唔睇好佢,認為費sir只係想開拓亞洲市場,通常俾人咁講法,球員都會急於証明自己嘅價值,但朴智星就默默耕耘,最終就用出色嘅表現令到批評佢嘅人收聲。依種少說話,多做事同埋喺自己範圍以內做到最好其實唔容易做得到。


三、隊友配合。由於佢比賽心態好,所以發放咗好多正能量俾隊友,但由於朴智星唔算一位獨當一面嘅球星,所以同佢合作嘅隊友嘅質素都好重要。當中前鋒有雲佬、C朗、朗尼、沙夏、貝碧、小豆同奧雲,個個都係出色嘅射手,但由於佢哋太強,究竟點樣可以發揮到自己實力之餘,而又唔會搶咗佢哋風頭,依個先係一門學問。朴智星之可以融合到佢哋除咗之前所講佢嗰種能力範圍以內做適當嘅嘢之外,就係體察到領隊要佢點配合隊友,隊友需要佢做逼搶時佢會去逼,需要佢做個人突破就會去過人,需要佢去組織攻勢或交波佢就交波,需要佢挺身而出去爭取入球就會走入禁區,當領隊需要換走佢時佢會絕對服從。喺數據上,作為一位攻擊球員,佢喺英超嘅搶截成功率有71%,但只係攞得6個黃牌。另外,佢喺奪回控球權平均每場有2.38次,再加上好多數據計算唔到嘅貢獻,所以佢點解可以喺曼聯踢咗7年,贏咗4次英超聯賽冠軍、、3次聯賽杯冠軍、2次社區盾、1次歐聯冠軍同埋1次世冠杯。

當筆者寫朴智星時,其實都有好大提醒。點樣先係一位成功嘅人呢?我覺得只要係做一啲適合自己嘅事就已經可以係好成功,而唔係樣樣嘢都做到100分,因為每個人所擔當嘅角色都唔同。唔知曼聯往後仲有冇亞洲球員可以好似朴智星咁多人認同呢?


============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
如欲購買曼聯官方產品,可到RS與曼聯官方網店United Direct合作的連結: http://bit.ly/royceud1
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


留言


請按此登錄後留言。未成為會員? 立即註冊
    快捷鍵:←
    快捷鍵:→