[多奇出品] - 麥佳亞在曼聯的存在價值

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


曼聯喺後防主將麥佳亞缺陣下,近三場嘅戰績係1和2負,共失7球。依個戰績同失球數字對球迷嚟講係難以接受,好彩球隊依家確定今季排第二,令到輸波所帶嚟嘅影響減至最低。
當麥佳亞在陣時,佢成日俾人話移動速度慢,而且動作唔夠硬淨同埋又無團火,根本未夠班踢曼聯。但係依家無咗佢又見到個波喺後場想傳俾中場都唔容易,而且高空波完全無優勢。究竟喺麥佳亞缺陣底下,後防線缺少咗咩元素,令到整條後防線變晒樣呢?而佢除咗防守之外,仲有無其他貢獻呢?
一、傳波方面。麥佳亞睇落身型龐大,動作又慢,但點解對方前鋒會咁難截到麥佳亞嘅傳波呢?球迷唔難發現球隊好多時都能夠贏住形勢去踢。原因係麥佳亞嘅傳波有種滲透性同隱蔽性嘅特質,依兩種特質嘅傳波令到對方球員觸摸唔到麥佳亞嘅傳波時機同埋就算對手知道佢會咁做,亦都察覺唔到佢嘅線路。依種能力通常多數會喺進攻球員身上見到,因為佢哋要隱藏自己傳波路線組織攻勢同埋製造機會俾前鋒射門,比較少後衛擁有呢類高超嘅傳球技術,因為後衛主要工作始終都係以攔截同破壞對手攻勢為主,所以喺傳球技術嘅要求相對較低,而擁有依種傳球技能嘅中堅往往會俾人忽略。不過數據上就完全睇得出佢嘅價值,麥佳亞喺傳球次數同傳球成功次數都係排頭三位,而佢嘅傳球成功率更達到87.3%,依個數字甚至比起其他攻擊球員仲要好。
二、制空同截擊方面。有部份球迷可能會以龜嚟形容麥佳亞嘅速度,但係其實佢哋有無察覺到麥佳亞無論喺制空同截擊效率方面都好高。喺數據上佢响傳球阻截同高空爭奪成功次數都係排頭三位,真係好難想像佢會有依個統計數字。咁點解呢?原因係麥佳亞當企喺度時嘅判斷力同思考能力係最清晰,佢往往可以比對方早一步預知到皮球嘅落點,再加上自己嘅身高優勢,然後預早一步爭頂高空波,頂完之後仲要係盡量將個波頂俾隊友,保持個控球權。另外,佢喺截擊方面都有一手,由於麥佳亞傳波技術唔錯,所以佢捕捉對手傳波亦好在行。尤其係佢企喺度捕位時,能夠憑感覺預測對手傳球時機同線路,破壞對手攻勢嘅組織,令球隊有打反擊嘅機會。佢雖然跑得慢,但佢做決定到行動嗰刻嘅反應可以好迅速。
三、角球罰球助攻方面。由於麥佳亞有身高優勢,所以球隊有角球時,隊友盡量都會斬個波俾佢頂,雖然睇落佢個入球成功率唔高,但其實主要原因係對手防守目標太過鮮明,對方一定估到般奴或梳爾會斬俾麥佳亞,令到佢爭頂時遇到好大阻力。如果球隊可以有多一兩個衝得又頂得嘅球員捕喺禁區入面分散防守球員嘅注意力,麥佳亞得分機會就會相對提高。另外,佢亦都可以做誘餌嗰個頂住個位,俾其他隊友衝頂,可惜無隊友可以做到第二得分點。再加上當有罰球時,其實佢可以做到二傳俾隊友搶點,可惜攻擊線最能夠做到依樣嘢嘅只係得卡雲尼,浪費晒麥佳亞嘅身型優勢同助攻能力。
麥佳亞雖然仲有不足之處,但佢係咪真係廢到受盡各界批評呢?其實從一啲細節上嘅事去睇,就會發覺其實佢都有好多優點。除咗筆者以上所講嘅,其他球迷又留唔留意到佢喺隊中存在價值呢?


如果大家仍然未申請或想申請NowTV黎睇波,呢條連結有月費低至HK$268.00再有野送嘅計畫益大家:
➡➡bit.ly/RSNowTVSpecialOffer

============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→